Getxoko Udalak ia 250.000 banatu ditu seme-alaba txikien hezkuntza gastuetan laguntzeko
Getxoko Udalak banakako 4.372 diru-laguntza eman ditu, guztira 249.700 euro banatuz, familia getxoztarrei 2009-2010 ikasturtean beren seme-alaba txikien hezkuntzako gastuetan lagundu ahal izateko. Imanol Landa alkateak iragarri du ekimen horrek jarraipena izango duela datorren ikasturteari begira. "Murgilduta gauden krisialdian eta, askotan, familiek euren seme-alaben hezkuntza-prozesuan sortzen diren gastuei aurre egiteko dituzten arazoen ardura hartuta, aurtengo udal aurrekontuetan diru-partida berri bat aurreikusi dugu, helburu berberarekin, 2010-2011 ikasturteari begira familiei diru-laguntza zuzen horiek berriro eman ahal izateko", adierazi du tokiko agintariak. Aurkeztu ziren eskaerak 4.840 izan ziren. Guztira, 4.372 onartu zituzten eta 468 bertan behera utzi (27 epez kanpo aurkeztu zirelako eta 441k deialdian ezarritako baldintzak betetzen ez zituztelako). 1.067 eskaera Haur Hezkuntzako ikasleentzat izan ziren, 2.180 Lehenengo Hezkuntzako ikasleentzat eta 1.125 Bigarren Hezkuntzakoentzat. Argazkian, hainbat neska-mutil haur-eskolan.
Diru-laguntzaren arabera, diru kopuru bat eman da, eskaerak banan-banan finkatu direlarik, honako irizpide hauei jarraiki: 36.000 euro arteko balio katastrala duen etxebizitza batean bizi diren familiek, gehienez, 50 euroko diru-laguntza jaso dezakete —Haur edo Lehen Hezkuntzako eskola-ume bakoitzeko— eta 90 eurokoa (Bigarren Hezkuntzako eskola-ume bakoitzeko). 36.001 eta 50.000 euro arteko balio katastrala duten etxebizitzetan bizi direnentzako diru-laguntzak, gehienez, 30 eurokoak (Haur eta Lehen Hezkuntzan) eta 50 eurokoak (Bigarren Hezkuntzan) dira. Ekimena aparteko neurria izan da, EAJren eta PSE-EEren arteko 2009ko aurrekontu hitzarmenean jasotzen zena, gaur egun ekonomiak bizi duen beheraldiaren harira hartutakoa, udal iturriek zehaztu dutenez. Bestelako erakunde publiko zein pribatuk emandako beste laguntza, diru-sarrera edo baliabideekin batera jaso ahal izango da, Diru-laguntzen Udal Ordenantzak ezarritako baldintzen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun