Dagoeneko Moron de la Fronterako Sevilla II espetxean dago Urtzi Paul Larrea Algortako euskal preso politiko gaztea. Abenduaren 29an Basauriko kartzelatik atera ostean, joan zen asteartean eraman zuten bertara eta hasierako sarrera moduluan izan ondoren, bizimodu arrunteko modulu batera pasa zuten. "Modulu horretan beste euskal preso politikorik ez zegoen, eta Euskal Preso Politikoen Kolektiboaren (EPPK) borrokaldiaren hasieran egindako plantoaren ostean, isolamenduko modulura eraman zuten Urtzi. Handik berriro modulura aldatu zuten, bertan beste euskal preso politikorik ez, eta aste honetan hasitako plantoarekin etxekoek ez dakite moduluan edo isolamenduan izango duten", azaldu du Uribe Kostako Amnistiaren Aldeko Mugimenduak Etengabe bitakoraren bitartez. Bitartean, asteburuan, etxekoen bisita ere izan zuen. Gogoratu behar da EPPKren borrokaldiaren aldarrikapenetako bat inor bakartuta ez egotearena dela. Getxotik Moron de la Fronterara 942 kilometro dago. Argazkian, Urtzi Paulen atxiloketa salatzeko egindako manifestazioa.
Urtzi Paul iaz jarritako 5 urteko espetxe zigorra betearazteko atxilotu zuen Espainiako Polizia Nazionalak, abenduaren 21ean. Algortarrak eta epaitu zituzten gazte guztiek salatu zuten "torturen bidez deklarazioak sinatzera behartu" zituela Ertzaintzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun