Ertzaintzak 54 urteko gizonezko bat atxilotu zuen atzo gauean Getxon, aurretik autoa kontrako norabidean gidatu eta ertzain bat harrapatzen saiatu izana leporatuta. Herrizaingo Sailak zabaldu duenaren arabera, 21:15ak aldera, turismo batek Algortako etorbideko kontrako erraila okupatu zuen argiak amatatuta zituela. Horren eraginez, beste gidari bat errepidetik atera eta espaloira igo behar izan zen, talka ekiditeko. Bertsio ofizialarekin jarraituz, turismoko gidariak ez zuen autoa gelditu eta aurrera jo zuen. Galtzadatik irten zen kotxeak, berriz, turismoa jarraitzeari ekin eta Ertzaintzari deitu zion izandako istripuaren berri emateko. Orduan, Ertzaintzaren hainbat patruila-autok ustezko arau-hauslea jazartzeari ekin zioten, udalerrian zehar. Gidariaren altuerara heldu zirenean autoa gelditzeko agindu ei zioten baina berak ez zuen aintzat hartu eta lasterkan jarraitu zuen, "era ausartegian gidatuz". Azkenean, autoa Getxoko parking batean geldiarazi zuten.
Bertan, atxilotu zuten gizona, nahiz eta aurretik gidariari autoz ertzain bat harrapatzen saiatzea eta patruila auto bat jotzea leporatzen dioten. Polizien arabera, gidariak alkoholaren eraginaren pean gidatzen zuen, proban gehienezko kopuruaren hirukoitza eman zuela. Atxilotua Neguriko Ertzain-etxera eraman zuen eta bertan desobedientzia eta trafikoaren segurtasunaren aurkako delitu bana leporatzeko izapideak egin ondoren aske utzi zuten epaileak deitu arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun