Ostegun honetan, urtarrilak 14, 120 kilometro orduko haize boladak egon daitezkeela ohartarazi du Eusko Jaurlaritzaren Herrizaingo Sailak. Eragin handiagoa izango dute horiek kostaldetik hurbil, gaineratu dutenez. Euskalmet Euskal Meteorologia Zerbitzuaren iragarpenen arabera, goizean etorritako denboraleak sortu ditu haize ufadak; arratsaldean galduko du indarra. Herrizaingo Sailak alerta laranja eman du. Gauzak horrela, hainbat gomendio luzatu dizkie herritarrei: pertsianak, leihoak eta leiho-ateak itxi eta finkatzea gomendatu du; baita loreontziak, eguzki oihalak, eta haizeak eraman ditzakeen bestelako objektuak kentzeko ere. Kalean, berriz, jausteko arriskuan dauden erlaitz, harresi eta zuhaitzetatik urruntzeko eskatu die herritarrei. Eta bereziki obretan edo egoera txarrean dauden eraikinetatik gertu kontu ibiltzeko. Bitartean, ibilgailuak arduraz erabili eta abiadura moteltzea eskatu du, kostaldeko bideak, zubiak eta gune arriskutsuak ekidinez. Itsasontziei dagokienez, ahal bada horiek ez erabiltzea eta amarrak gainbegiratzea gomendatu dute Jaurlaritzako arduradunek; eta inola ere ur kirolik egitea. Istripurik izatekotan, 112 SOS Deiak-era deitu behar da. Argazkian, joan den urtarrilaren 24ko zikloiak hainbat ontzi hondoratu zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun