Matematiken 46. Olinpiadako lehenengo fasea, eskualde mailakoa, jokatuko da ostiral honetan, urtarrilak 15, EHUko Leioa eta Erandioko campuseko Zientzia eta Teknologia Fakultateko 1P13SG ikasgelan, goizeko 9:30etik aurrera. Lehiaketa Espainiako Matematika Elkarteak antolatzen du, eta lehen fase honetan, 2009-2010 ikasturtean Batxilergoan matrikulaturik dauden Araba, Bizkaia eta Gipuzkoako ikasle guztiek parte har dezakete. Guztira, 50 neska-mutil lehiatuko dira oraingo honetan, EHUko iturrien arabera. Fase honetan lehiakideek hiru problema ebatzi beharko dituzte goizean (9:30etik aurrera) eta beste hiru arratsaldean (15:00etatik aurrera). Saio bakoitzean hiru ordu izango dituzte hiru problemak ebazteko. Probak euskaraz edo gaztelaniaz egin daitezke, eta idazteko eta marrazteko tresnak baino ezin dira erabili, hau da, kalkulagailuak, liburuak, taulak eta bestelako dokumentuak debekatuta daude. Argazkia: cc-by *Irish.
Lehenengoak 380 euro jasoko ditu; bigarrenak, 285 euro; eta hirugarrenak, 220 euro. Gainera, hirurak bigarren fasera (Espainia mailakora) igaroko dira; Valladoliden izango da, martxoaren 25tik 28ra bitartean. Bigarren fase horretan lehenengo sei sailkatuei urrezko domina eta 750na euro emango dizkiete, eta gainera nazioarteko talde olinpikora pasatuko dira, Nazioarteko 51. Matematika Olinpiadan lehiatzeko, uztailean, Kazajstan-en. EHUk, ohi bezala, lehiaketa prestatzeko tailer bat antolatu du. 2009an Josue Tonelli, tailerrean parte hartu zuen ikasle bat, lehena izan zen Matematikako Olinpiadaren eskualde fasean eta brontzezko domina lortu zuen Espainia mailako fasean. Horrezaz gain, zilarrezko domina eskuratu zuen Espainiako Fisikako 20. Olinpiadan, baita urrezko domina Fisikako XIV. Olinpiada Iberoamerikarrean ere. (http://www.ehu.es/olimpiadamat).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun