Astrabudua eta Erandioko PSE-EEren gazteriek "lehenengo afiliatze kanpaina" jarri du martxan. Tokiko JSE-Egaz erakundeko kideek taldeko blogean adierazi dutenez, esku-orria sortu eta kalean banatzeari zein hainbat tokitan uzteari ekin diote. Udalerriko gazteen artean JSE-Egazen afiliazioa sustatzeko Pablo Nerudaren olerki bat eta espainol hutsez idatzitako testu laburra erabili dute. Idazkian, "justizia, berdintasuna, elkartasuna, askatasuna, garapenerako lankidetza, ingurumenaren defentsa, errespetua eta elkarbizitza bezalako baloreengandik" abiatu eta "gure auzoa hobetzeko gure harri koxkorra ekartzeko" asmoa dutela aldarrikatu dute. Udalerriko gazteria sozialistak pasa den azaroaren 20an jarri zituzten martxan berriro, Erandion hainbat urtez desantolatuta egon ondoren. Argazkian, Altzagako herriko etxean batzen da Erandioko JSE-Egaz taldea.
Ekimenean, JSE-Egaz eta PSE-EEren hainbat buruzagi izan ziren. Besteak beste, Aitor Casado JSE-Egazen idazkari nagusia; Eduardo Madina Espainiako Kongresuan PSOEk duen diputatuen taldeko idazkari nagusia; Mikel Torres Portugaleteko alkatea; eta David Herrero Astrabudua eta Erandioko JSE-Egazen idazkari nagusia. Bertako taldea "Espainian sorturiko lehenengo gazteria sozialisten elkartea" ei da, JSE-Egazen arabera eta 1903n bildu zen lehenengo aldiz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun