Turismoa erakartzeko eta bere bisitariei kalitatezko zerbitzua emateko helburuz, aurrekontuan horretara bideratutako diru-partida hirukoiztu du azken bost urtetan Sopelako Udalak. Horrela, 2004ko ekainetik aurrera, Turismo Bulegoak udaletxeko beheko solairuan ateak ireki zitueneko 167.000 euroetatik 2009ko 439.000 euroetara pasa dira, tokiko iturriek nabarmendu dutenez. Kopuru horri gehitu behar zaio Larrabasterran eta Sopela erdigunean "turismo puntuak" egokitu eta jartzeko inbertitutako 100.000 euroak. Sopelako Udalaren eta Bizkaiko Foru Aldundiko ordezkariek aurkeztu dute gaur, ostirala, Sopelako Turismo Bulegoaren azken 5 urteotako jardueraren balantzea, Kurtzio Kultur Etxean. Josu Landaluze alkateordeak adierazi duenez, Udalaren apustu estrategiko hori “hutsetik jaio zen ia, eta berritzearekin dugun konpromisoaren adierazle da, turismoan erantsia”. Gaur egun, Sopelako udaletxe ondoan kokatuta dagoen Informazio puntuaz gain, 2005etik Larrabasterran ere badago turismo bulegoa, hondartzerako sarbide naturalaren parean. Gainera, urtetik urtera, geroz eta kontsulta gehiago jasotzen ditu, aipatu dutenez. Bisitari horien intereseko gaiak dira: ostatua, jatetxeak, ibilbideak edo hondartzak; Uribe Kosta, Bizkaia edota autonomi erkidegokoak orokorrean. Argazkian, udal zein foru arduradunak gaurko aurkezpenean / © Joseba Zubiaur - Sopelako Udala.
Lan hori guztia aurtengo udan aitortu diete kalitatezko Q izendapena ematean, lan prozesu luzea burutu ostean. Landaluzek adierazi duenez, "izendapen hori erantzukizun karga ere bada. Urtero kontu-ikuskapena gainditzera behartzen gaitu. Kontu-ikuskapen horrek sistemaren ezarpen maila neurtzen du eta lan ona egiten ari garela ziurtatzen du. Erantzukizun hori gustura hartzen dugu gure gain”. Turismo bulegoetan azkeneko bosturtekoan jasotako datuek gorakada ikusgarria izan dute, udal arduradunen hitzetan, zenbatutako bisitarien kopuruari dagokionean. Emandako datuen arabera, 2004an informazioa eskatzeko gerturatu ziren 435 pertsonetatik, iaz bertoko adituekin harremanetan jarri ziren ia 11.300etara egin du jauzia. "Zalantzarik gabe, Turismo informazio Puntuak eta hondartzetatik gertu kokatuta dagoen turismo bulegoak jauzi handia eman dute. Horren adierazle nabaria da ondoko datua ere: zenbatutako kontsulten kopurua %31 igo da 2008ko kopuruarekin alderatuta", azaldu dutenez. Turismo Bulego eta Turismo Informazio Puntuko erabiltzaileek gehien eskatu duten informazioa izan da: garraioari buruzkoa, hHondartzak, kultura eta kirol Jarduerak, ostatua, ibilbideak eta jatetxeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun