Algortako Gazte Asanbladak deituta, bihar, larunbatarekin, "Kalea herriarena da!" jaialdia egingo dute Getxoko Txorimalo gaztetxean. AGAk zabaldu duenez, gaueko 9etik aurrera, Elorrioko Namek Planet eta Garrasika taldeek joko dute kontzertuan. Sarrera hiru eurotan hartu ahal izango da gaztetxearen sarreran bertan eta bilduko den dirua Getxoko Udalak jarritako isunak ordaintzeko baliatuko dute. Izan ere, gazteek gogoratu dutenez, udal baimenik gabe kalean ekimenak antolatzeagatik tokiko administrazioak bi isun jarri dizkie gazte asanbladako kideei. Horrela, Txorimalo gaztetxearen III. urteurrenaren harira iazko apirilaren 17an Algortako Txiki eta Otaegi plazan umeentzako puzgarri eta tailerrak jartzeagatik 300 euroko zigorra jarri zien Imanol Landa jelkideak zuzentzen duen Udal Gobernuak. Kopuru bereko beste isun bat ezarri zieten pasa den urriaren 31n, leku berean 500 lagun baino gehiago batu zituen 10. Indabada egiteagatik. Argazkian, hainbat neska-mutil AGAko kideek apirilean jarritako puzgarriren batean jolasten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun