Getxoko Udalak ezgaituak diren umeentzako jolasgune berria egokitu du Areetako Eskoletako plazan, Getxo udalerrian ezaugarri horiek dituen lehenengoa. Gainera, tokiko arduradunen arabera, "Euskadiko udalerrien artean, Getxo da era honetako jokoak ipintzen duen lehenetakoa". Zabu eremu berri honetan jolasen garaiera eta azalera egokitu dituzte elbarriak diren neska eta mutikoen olgeta erraztu aldera, gurpil-aulkiak asko hurbil daitezkeelako eta eskubandak eta heldulekuak dituztelako maila desberdinetan. Ipinitako elementu berriek –hiru dorre, sare bat eta bi zabuko multzoa–, pertsona ezgaituak sartzeko pasabide egokituak dituzte, eta arlo horretan indarrean dagoen Europako araudia betetzen dute. Horretaz gain, jolasgunean kautxuzko zoladura berri jarraitua ipini dute, koloretakoa, eta, hortaz, zabu horiek segurtasun neurri egokiekin hornitu dira. Jolas eremu berri horren balioa, zabuen eta zoladura ipintzeko lanak barne daudela, 62.000 eurotik gorakoa da. Argazkian, ezkerretik eskuinera, Joseba Arregi Hirigintza zinegotzia, Juan Carlos Sola FEKOOR-Urritasun fisikoa duten pertsonen Bizkaiko Federazio koordinatzailearen zuzendaria eta Imanol Landa alkatea, gaur goizean emandako prentsaurrekoan.
“Instalazio berri honek plazan bertan jada dagoen joko gunearen erabiltzaile-sorta zabaltzea ahalbidetuko du, orain artean berez adin askotako lagunak hartzen bazuen ere, eta, ondorioz, are integratzaileagoa izango da”, esan du Imanol Landa alkateak, gaur goizean eskainitako prentsaurrekoan. Ekimen hori, aipatu duenez, “Getxoko Udalak, aspaldi, irisgarritasunaren alde egin duen apustuaren harira dator, guztiontzako Getxo bat egin nahi baitugu, non mugitzeko arazoak dituzten pertsonek, bereziki txikienek, gainontzeko bizilagunek duten eguneroko antzeko bizitza eduki dezaten”. Hurrengo urratsa, "berandu baino lehen", Algortan gune bat egokitzea izango da era honetako ekipamendua ipini ahal izateko, Landak aurreratu duenez. FEKOOR-Urritasun fisikoa duten pertsonen Bizkaiko Federazio koordinatzailearen zuzendari Juan Carlos Solak, bere aldetik, Udalaren ekimena eskertu du. Nabarmendu duenez, “garaiotan ukaezinezko apustua da, guztiontzako diseinua eta irisgarritasun unibertsala pertsona guztien eskubidea delako, eta neska-mutikoekin hastea gauza ona da”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun