Euskal Preso Politikoen Kolektiboan dauden Uribe Kosta eta Erandioko 39 presoak eta beste guztiak sustengatu eta gatibuek egindako aldarrikapenak babestu zituzten (mp3) atzo 500 bat pertsonek. Izan ere, hamaika orduko elkarretaratze txandakatua burutu zuten Algortako Telletxe kalean, goizeko 9etatik gaueko 20:00ak arte. Bertan, Amnistiaren Aldeko Mugimendua, Etxerat, preso ohiek, LAB, EHNE eta Hiru sindikatuak, Athleticeko eta Getxo Rugbyko jokalari ohiak, arraunlariak, Herri Norte Taldea, eskualdeko gaztetxe eta gazte asanblada guztiak, gazte independentistak, ezker abertzalea, Gorrondatxe abesbatza, "UK" aldizkaria, Koska irratia, UKBERRI.NET, EHUko Kazetaritza fakultateko hainbat irakasle, eskualdeko hainbat kultur talde eta dozenaka auzokide izan ziren. Goizean, Ertzaintzak pankartan eta inguruan zeuden presoen argazkiak eraman zituzten. Gauean, berriz, herritarrek Aitor Elortza errefuxiatu zena omendu zuten (mp3) hil eta lau urtetara, bere arrebarekin batera. Ekimena bukatzeko, 200 bat lagunek manifestazioa egin zuten herrian zehar. Argazkian, Aitor Elortzaren omenez egindako ekitaldiaren irudi bat. Audioak: cc-by Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun