"Bizi arteko zigorrik ez!" lelopean, 150 bat pertsonek Jon Bilbao Moro Asuako auzokidea askatasunean uzteko aldarrikatu dute Astrabuduan. Ekitaldia (mp3, euskaraz eta espainolez) goizean burutu dute Josu Murueta plazan. Bertan, "Parot doktrina" bertan behera uzteko eskatu eta Euskal Preso Politikoen Kolektiboak aldarrikatutakoekin bat egin dute. Horrela, preso gaixoak eta zigorra beteta dutenak askatasunean uztea; ezarritakoaren hiru laurdenak beteta dituztenak behin behinean kaleratzea; bakartze eta isolamenduarekin bukatzea; eta prozesu politikoan parte har dezaten presoak Euskal Herrira ekartzea, "beren eskubide guztien jabe", eskatu dituzte gaurkoan, besteak beste. Ildo horretatik Anjel Figueroa Algortako preso gaixoaren kasua nabarmendu dute eta etxean ez ezik aske ere uzteko eskatu dute. Era berean, laster espetxean 30 urte beteko duten Jose Maria Sagardui "Gatza" eta Jon Agirre presoak gogoratu dituzte. Bestalde, Jon Bilbao Mororen senideei omenaldia egin diete, 28 urtez bizi izandako oinazeagatik eta agertutako adoreagatik, Bilbao espetxe batetik bestera jarraiki beren maitasuna eramanez.
Izan ere, pasa den ostiralean 28 urte bete ziren "1982ko urtarrilaren 15ean atxilotu, 9 egunez inkomunikatu eta torturatu, eta espetxeratu egin zutela" Jon Bilbao Moro. Bere ziegakideak izan diren preso ohiek ere parte hartu dute ekimenean, aurten aterako deneko esperantzarekin. Ekitaldiaren ostean, manifestazioa egin dute auzoan zehar eta "mendekuzko espetxe politikarekin" bukatzeko exijitu dute PSE-EEren egoitzaren aurrean. Auzokideak, berriz, azken ostiraletan eta presoen aldeko ekimen guztietan parte hartzera deitu dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun