Makinek lanean jarraitzen dute Urdulizko Labetxe inguruan, etorkizuneko zerbitzu-industrialdea izango dena urbanizatzen. Han, 1.300 metro koadroko lursail batean, Urdulizko Udalak pabiloi industrial bat eraiki du, biltegi bezala erabiliko dena, tokiko erakundeak erabilitako edo erabiltzeko moduko ekipamendu mota oro gordetzeko. Pabiloian, era guztietako makina eta tresnak gordetzeaz gain, biltegiak eta aldagelak ere badira. Udal Zerbitzuen Pabiloia eraikitzeko lanak 2009ko uztailean hasi ziren, eta Construcciones Amuriza S.L. enpresa esleipendunak sei hilabeteko epea izan du horiek amaitzeko; eta horrela egin du, pabilioia erabat bukatuta baitago, Europa Press albiste agentzia espainolaren arabera. Orain, azken ukituak ematen ari dira bertan, eraikinaren barrualdeko azken lanak egiten, alegia; eraikina egokitu eta txukuntzeko, behin betiko itxura izan arte. Horrela, egun gutxitan, Urdulizko Udalak pabiloi berria izango du erabilgarri. Eraikinak bi solairu ditu eta, guztira, 835 metro koadroko azalera du. Kanpoaldetik, aurrefabrikatutako hormigoizko fatxada ikus daiteke, bistakoa eta koloreztatua. Argazkian, Juan Olea Urdulizko alkatea, Getxon emandako prentsaurreko batean.
Udal eraikin honen eraikuntzari esker, Urdulizko Udalak gaur egun dauden biltegiratze-beharrizan guztiei erantzun ahal izango die, bai eta hemendik aurrera sortuko direnei ere. Era berean, pabiloi berri honi esker, orain arte udal materialak gordetzeko erabili izan diren espazio batzuk libre geratuko dira, eta, laster, beste erabilera batzuetarako erabili ahal izango dira. Udal Zerbitzuen Pabiloia Labetxe eremuan kokatuko da, eta, bertan, hirugarren sektoreko beste enpresa batzuk ere izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun