Zigor Goikoetxearen abokatuak aurkeztutako errekurtsoari jarraiki, Azkorriko gazteari jarritako zigorra aztertzeko bista publikoa egingo dute urtarrilaren 28an, osteguna, Espainiako Auzitegi Gorenean, Europa Press albiste agentzia espainolak zabaldu duenez. Andres Martinez Arrieta, Juan Ramon Berdugo, Carlos Granados eta Jose Ramon Soriano magistratuek osatuko dute epaimahaia. Auzitegi Nazionalak 2009ko ekainean kaleratu zuen Goikoetxearen aurkako epaia. Bertan, bi urteko espetxe zigorra, Marisa Arrue PPren zinegotziari 6.000 euroko isuna ordaintzea eta berarengandik 300 metro baino urrunago egotera zein Getxotik at, bizitzea ezarri zioten Goikoetxeari. Era horretan epaileek ontzat eman zuten Marisa Arruek gaztearen aurka balizko heriotza mehatxuengatik jarritako salaketa. Epaiketa apirilaren 14an egin zen eta bertan lekuko guztiek ukatu zuten Goikoetxeak mehatxuak egin izana. Hala ere, auzi honengatik ia 11 hilabete egin zituen preso gazte getxoztarrak. Uztailaren 15ean irten zen kalera, 6.000 euroko fidantza ordaindu ostean. Argazkian, Zigor Goikoetxea uztailaren 15ean egin zioten harreran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun