Guardia Zibilak uztailaren 29an egindako polizia operazioak "normaltasunez aritzeko oztopoak" ekarri zizkion Gaztesareari. Hori dela eta, gazte informazio ataria ixtea erabaki zuten joan den astean. Baina, bihartik aurrera, gazte mugimenduak atari digital berria izango du: Topatu.info. Azaldu dutenez, "gazteon topaleku izango den web orrialdea jaio da. Ostiraletik aurrera egonen da martxan. Bertan izango dugu Euskal Herriko gazteok elkarren berri jakiteko parada, elkarrengandik ikasteko abagunea. Gure esperientziak trukatzeko gunea izateko helburuarekin jaio da. Gure arteko komunikazio zubiak eraikiko ditugu". Hori egia bilakatzeko, ordea, Topatu.info-k "ezinbestekotzat" jotzen du elkarlana: "Gure herri eta auzoetan egiten ditugun ekimenen eta egoeraren berri emateko zuen parte hartzea ezinbestekoa da", aipatu dute agerkari digital berriko arduradunek. Horretarako nahikoa da topatuinfo[abildua]gmail.com postara testu, argazki, audio zein bideoak bidaltzea. Gainera, sareak ematen dituen beste zenbait bitarteko ere baliatuko dituzte. Hala, publikatzen den albiste oro Twitter eta Facebook bidez ere zabalduko dituzte, berehalako informazioa jasotzeko eta ahalik eta eremu gehienetara iristeko. Koska irratian ekoizten den "Irauli Uhinak" irratsaioak ere aurrera darrai. Argazkian, uztailaren 29an, 700 bat lagunek salatu zuten Iker Acero Algortako surflari ezaguna eta Gaztesarea.net-eko gainontzeko kideen atxiloketak. Era berean, Gaztesarea Euskal Herriko gazte atariari sostengua ere adierazi zioten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun