Algortan, Iturgitxi parkean, umeentzako jolaslekuaren eremua handiagotzeko lanak amaitu dituzte jada. Gaur goizean bertan Imanol Landa alkateak aurkeztu duen jolastokia, orain, lau bider handiagoa da: 108 metro koadro zituen lehengoak eta 439 ditu oraingoak. Jolaslekuaren barruan gune desberdinak jarri ahal izan dituzte, umeen adinaren arabera. Gainera, parkean bertan, saskibaloian jolasteko kantxa egokitu dute eta saskia ipini dute umetxoentzat. Jolaslekuaren bost gune desberdinak, bata bestearekin lotuta daude. Bestalde, berdeguneak berriro diseinatu dituzte eta eserleku berriak ipini dituzte, udal iturriek zehaztu dutenez. Lanak egiteko orduan parkea erabiltzen dutenen iradokizunak jaso direla ere aipatu dute. "Zabaltze lanekin, beraz, inguruko bizilagun askoren eta Iturgitxi, Basarrate eta Villaondoeta kaleen artean dagoen parkea erabiltzen duten beste lagun askoren eskaera asebetetzen da", tokiko agintarien ustez. Lan horien aurrekontua 180.000 eurokoa izan da eta Espainiako Gobernuak emandako diru laguntzaren kontura egin da. Argazkian, udal arduradunak saskibaloian jolasten / © Getxo.net.
Landak adierazi duenez (mp3), “Getxon gehien erabilitako jolaslekua da. Espazio publikoetan ezarri nahi dugun filosofia berria jasotzen da parke honetan; belaunaldien arteko bizikidetzan laguntzea, alegia. Obra honekin eta antzeko eremuak berriztatzeko obrekin, hala nola, Eskoletako plaza, Areetako Moila, Malakate plaza, Gobelaurre parkea eta Ereagako hondartzakoekin, leku horiek adin guztientzakoak, eta bereziki 12 eta 17 urte arteko gazteentzako gune publikoak izan daitezen nahi dugu”. Getxo Saskibaloia Taldeko presidente Prisco Fernandez ere parkearen aurkezpen ekitaldian izan da, eta pozarren agertu da eremu berri honetan saskibaloi kantxa ipini dutelako. Fernandezek uste du “erabat beharrezkoa dela herriko gazte guztiek era honetako gune gehiago izan dezaten elkarlana eta adiskidetasuna bezalako baloreak sustatzeko”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun