Epaiaren zain dago amiantoak hildako Francisco Javier de Castro leioaztarraren inguruko auzia
Atzo, asteazkena, egin zen Francisco Javier de Castro leioaztarraren heriotzaren gaineko epaiketa Bilbon. Altos Hornos de Vizcaya enpresan lan egin zuen 60ko hamarkadan, amiantoarekin "inolako babesik gabe" lan egiten zuten garaian. 2007ko urrian zendu zen, medikuek mesotelioma bat antzeman ziotenetik sei hilabetera. Lanak eragindako gaixotasuna zelakoan, horren alargun Natividad Vaquerizak enpresaren aurkako salaketa jarri zuen. Epaiketa irailean zen egitekoa, baina Altos Hornos de Vizcaya-ren oinordeko Altos Hornos Ensidesa Capital enpresak atzeratzea lortu zuen "amarruz", "Gara" egunkariak gaurko alean azaldu duenez (espainolez). Hala ere, atzokoan "frogatua" geratu zen AHVn segurtasun zein langileen osasuna babesteko neurririk ez zegoela, aipatu kazetaren arabera. De Castroren lankide izan zen Manuel Ocio Ibanezen arabera, kontaktua amiantoarekin "eguneroko ogia" zen Ezkerraldeko enpresak. Gauzak horrela, epaiaren zain geratu da auzia. AHVren segurtasun neurrien gabeziaren inguruko prestazioetan %50eko errekargua eskatzen du langile leioaztarraren alargunak. Argazkian, LAB sindikatuak Mutualiaren aurka azaroan egindako mobilizazioaren irudi bat.
Francisco Javier de Castro leioaztarra 2007ko urriaren 11n zendu zen, 63 urte zituela, amiantok hilobira eramanda. 1995 eta 1999 bitartean Izquierda Unida alderdiaren zinegotzia izan zen Leioan. Era berean, 1990ean EAEko lehendakarigaia ere izan zen, alderdi beraren zerrendetan. Lanari dagokionez, Altos Hornos de Vizcaya enpresako behargina izan zen eta enpresa horrek ixtean zegokion baino aurretik jubilatu zen. Tartean, EAEko CCOO sindikatuan ere ardura karguak izan zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun