Gainera, mahai-inguruan parte hartuko dute Erlatz Ibarrondo Indarkeria faxista, arrazista eta homofoboaren biktimen elkarteko kideak; Xotero Etxandi faxismoaren biktimak; eta Helena Martinez Madrilgo Koordinadora Antifaxistako bozeramailea eta IZCAko militanteak. Saioa Juantxo Estebaranz Tas-Tas irratiko kideak gidatuko du.
II. Topaketa Antifaxista
Bestalde, datorren otsailaren 6an, Euskal Herriko mugimendu antifaxistak bigarren nazio topaketa egingo du Bilboko Kukutza gaztetxean. Beste hainbat ekimenen artean, DAR musika talde algortarrak kontzertua eskainiko du. Sare Antifaxistak aurreratu duenez, honako hau da jarritako egitaraua:
• 10:00etan, ongi etorria.
• 10:30ean, asanblada orokorra.
• 15:00etan, bazkaria.
• 17:00etan, bideo eta material antifaxisten salmenta.
• 20:00etan, kontzertuak Estricalla, Karkaba eta DAR musika taldeekin. Sarrera bost eurotan erosi ahal izango da.
• Kontzertua amaitzean, musika antifaxista.
Sopelan hainbat urtez bizi izan den Sonia Polo bilbotarrak faxismoaren biktima bezala bere lekukotasuna emango du bihar goizean Bilbon. Sare Antifaxistak antolatutako mahai-inguruaren hitzordua goizeko 11:30ean izango da, Bilboko Zazpi Kaleetako Burtsa hiri-zentroan, Pilota kalean. Polo txupinera izan zen pasa den Bilboko Aste Nagusian eta izendatu zutenetik, PP eta PSOE alderdien eta "El Correo Español" egunkariaren etengabeko jazarpena jaso zuen, Sergio Polo ETAko presoaren arreba izateagatik. Ondoren, bere argazkia eta bala bat zuen gutunazala igorri zuten Bilboko Jai Batzordera. Mehatxu hori Falange y Tradicion talde faxistak aldarrikatu zuen, Zigor eta Arkaitz Goikoetxearen gurasoen etxeari su ematen saiatu eta heriotza mehatxuak idatzi zituen berbera. Egun, FyTko kide guztiak kalean daude. Polorekin batera, besteak beste, Maria Victoria Muñoz "Mavi" Carlos Palomino zenaren ama izango da. Argazkian, Sonia Polo, beltzez, beste txupinerek, konpartsek eta auzokideek bera babesteko egindako agerraldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun