Patxi Lopezen agintaldiak Urdulizko ospitalearen proiektuari ere ekarri dio aldaketa. Bigarrenez aurkeztu dute egitasmoa, gaur bertan. Rafael Bengoa Osasun sailburuak azaldu duenez, aurretiko kargudun Gabriel Inclan jelkideak aurkeztutakoa eta oraingo proiektuaren arteko desberdintasuna "kontzeptua" bera da: Uribe Kosta inguruko 167.000 bat biztanleri arreta emateko asmoz, espezialitate mediko eta kirurgiko gehiago izango ditu zentroak, onkologia barne, Gurutzetako ospitalearen menpe egon behar izan gabe. Hala ere, espezialitate gutxi batzuetarako Barakaldo aldera edo Basurtura joaten jarraitu beharko dute gaixoek. Bestalde, lehen mailako arreta zerbitzua emango diete oraindik orain Areetako osasun zentrora joan behar izaten duten Urduliz inguruko lagunei. Eraikuntza lanak datorren hilean esleituta, 2010eko apirilean jarri nahi dute lehenengo harria; obrak 2013ko martxoan bukatu eta handik bi hilabetera, maiatzean, zabaldu ahal izateko. Andra Mari elizatik gertuko orube batean altxatuko dute Uribe Kostako ospitalea. 2013ko irailean, berriz, ama-umeentzako blokea altxatzen hasiko dira horren parean; Gurutzetako ama berrien atala arintzeko asmoz. Azken hori 2015eko ekainean zabaldu nahi dute. Argazkian, Bengoa azalpenak ematen gaur, Julian Perez Osakidetzaren zuzendari orokorraren eta Javier Bilbao Urdulizko alkateordearen (ezkerretik eskuinera) begiradapean.
Eusko Jaurlaritzaren Osasun Sailaren aurreko arduradunen aurreikuspenak kontuan hartuta, 2009ko abenduan ekingo zioten Uribe aldeko ospitalea eraikitzeari. Proiektuari egindako aldaketek eragin omen dute lanen hasieraren atzerapena. Baina, arestian aipatu bezala, epeak ez dira aldatu den gauza bakarra. Espezialitate mediko eta kirurgiko gehiago jarrita azalera handiagoa hartuko du zentroak; 36.000 metro koadro guztira, Julian Perez Gil Osakidetzaren zuzendari orokorrak zehaztu duenez. Aurrekontuan ere eragingo du horrek. Orotara, 78 milioi euro erabiliko dira, horietatik 60 milioi —horretan 40 milioi gastatu behar zituen Inclanek— eraikuntza lanetarako eta 18 milioi materiala erosteko. Gainera, 160 ohe jarri beharrean, 216 ipiniko dituzte. Bien bitartean, "eskertuta" agertu da Javier Bilbao Urdulizko alkateordea, proiektua aurrera doalako. Paradoxikoki, osasun arazoek eragotzi diote gaurko aurkezpenean egotea Juan Olea alkateari. Bilbaok aipatu duenez, Urdulizen eta Uribe Kostan "iraganaren eta geroaren arteko muga egingo du" ospitale berriak: "osasun zerbitzuak gurera ekartzeaz gain, enplegua, tokiko merkataritza eta bizi kalitatea sustatuko ditu", aipatu duenez. Uribe Kostako ospitaleak zuzeneko 800 lanpostu eta zeharkako beste 700 bat sortuko ditu, Osasun arduradunen aurreikuspenen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun