Metro Bilbaok azaldu duenez, "Maidagan kalea etetearen arrazoia da euri-urak eta ur beltzak bideratzeko instalazioak ezarri behar direla. Ur horiek lurpetik joango dira kale horretan zehar trenbide-pasaguneraino". Une honetan, enpresa adjudikazio-hartzaileak metroaren egungo trazadurarekiko paralelo doan behin-behineko trenbide bat instalatzen ari dira. Trenbide hori beharrezkoa da zulatze-lanak hasteko aukera emango duten lurrak libre uzteko.
Aldaketak Bizkaibusen
Maidagan kaleko trafiko-etenak aldaketak ekarriko ditu Bizkaibusen hiru lineatan. Urtarrilaren 25etik aurrera, ondoko linea hauek Bidezabal kaletik eta Aingeruaren Etorbidetik desbideratuko dira Getxora heltzeko: A2164 Getxo-EHU (Makaleta Etorbidea ), A3414 Bilbo-Getxo (Artxandako tuneletatik) eta A3471 Getxo-Gurutzeta (Faduratik). Beste abisurik ez dagoen bitartean, Maidagan kaleko 22 eta 59 zenbakietako geralekuak kendu egingo dira. Horien ordez, Bidezabal kaleko geralekua (Benantzio bidegurutzea) eta Aingeruaren Etorbideko 34 zenbakikoa (Benta) jarriko dira, hurrenez hurren.
Bizkaiko Garraio Partzuergoa (BGP) aurrera darrai Getxo aldeko Maidagan kaleko trenbide-pasagunea kendu eta handik gertu geltoki berria jartzeko lanekin. Obrak beste fase batean sartu ahal izateko, astelehenetik (urtarrilak 25) aurrera, ibilgailuen trafikoa eten egingo dute Maidaganen, pasonibeletik Mugarra kalera bitartean. Getxora joateko, Ormaza estratatik eta Aingeruaren Etorbidetik joan beharko dira autoak, Bidezabal kalean zehar. Egoera hori horrela mantenduko dute pasagunea lurperatzeko proiektua burutu arte, hau da, 2011ko urte amaierara arte, Metro Bilbao enpresako arduradunek zehaztu dutenez. Hala ere, oinezkoentzako pasabide alternatiboak prestatuko dira obrek irauten duten bitartean. Aipatu trafiko aldaketa Bizkaibusen hiru lineetan ere izango du eragina. Bestalde, 2010eko aurrekontuetan milioi bat euro jarri du Urdulizko Udalak, bertoko trenbide-pasagunea lurperatzeko. Lan horiek Getxo aldekoak bukatuta hasiko omen dira, 2011ko bukaeran —2008ko amaieran ziren hastekoan—. Orotara, trenbideko 800 metroko zatia lurperatuko dute, Plentziarako tuneletik Sopelako mugara bitartean. Obra horiek 24 milioi euroko aurrekontua daukate. Argazkian, trenbide-pasagunea Maidaganen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun