Bikoteak gogor lan egin zuen hurrengo urteetan eta, azkenean, Plentzian lursail bat erosi eta etxea eraiki zuten. Bertan, zortzi seme-alaba izan zituzten. Juliak ortua eta azienda zaindu, eta hondartzan txirlak biltzen sos batzuk ateratzen zituen. David, berriz, igeltsero aritu eta zortzi seme-alabez arduratzen zen, lau mutil eta lau neska. "Arropa dena berak egiten zigun, ilea moztu, zinemara edo Logroñon eskolan zeuden bi arreba gazteak bisitatzera eroan. Neba-arreba guztiok berdin hezi gintuen eta denok ikasi genuen denetik egiten: josten, plantxa egiten, garbitzen...". Baina, 1972ko maiatzaren 5ean, alargun gelditu zen Julia, senarra gaixotasunez hilda. Bost eta bederatzi urte beranduago, beste bi galera handi izan zituen, Dabi eta Mario semeena.
Seme militanteen heriotzak
Orain dela hamaika egun, hilaren 14an, 32 urte bete ziren Dabi Alvarez Peña ETAko militantea hil zenetik. 1977ko abenduaren 18an lau gazte Lemoizeko zentral nuklearraren aurkako ekintza prestatzen ari zirenean enfrentamendua izan zuten Guardia Zibilaren kontra. Enfrentamendu horretan Dabi larriki zauritu zuten. Beste hiru lagunek lortu zuten alde egitea, erabilitako ibilgailua han utzita; Dabi ere han geratu zen, lurrera erori baitzen sabelean jaso zuen tiroaren eraginez. Lagunek atzera egin zuten laguntzeko, baina Dabik ihes egin zezaten ekin zien bera bizkarrean hartuta ihesa ezinezkoa izango zatekeelako. 27 egun beranduago, urtarrilaren 14an, Basurtuko Ospitalean hil zen.
Alvarez Peña familiak kereila kriminala jarri zuen Dabiren heriotzarengatik, baina ez zuen aurrera egin. Gaitzespen eta salaketa ugari eragin zituen haren heriotzak. Euskal Herrian leku askotara hedatu zen greba orokorra eta Basurtuko ospitaleko langileek ere beren gaitzespena azaldu zuten Dabi Alvarezek jasan zuen egoeraz.
Mario Alvarez Peña, berriz, 1981eko martxoaren 17an hil zen. Egun horretan, gaueko bederatziak aldera, ETA militarreko eledun batek, urduritasun eta samin handiz, honako hau adierazi zion "Egin" egunkariari: "ETA (m)-ko kidea naiz. Entzun ondo esango dizudana eta, mesedez, jakinaraz iezaiozu berehala familiari. Mario Alvarez Peña, gure erakundeko kidea eta Dabiren anaia, istripu batean hil da. hilotza Barrikako hilerriko atarian dago, manta batek estalia. Arren, esaiozue hau lehenbailehen bere familiari, Sopelan bizi da".
Julia Peña Urrutia, Mario eta Dabi Alvarez Peña zirenen ama, atzo, igandearekin hil zen Gorlizen, 84 urte zituela. Plentzia, Gorliz eta Lemoizko ezker abertzaleak jakinarazi duenez, azken agurra emango diote gaur, astelehena, arratsaldeko 18:00etan, Barrikako Andra Mari elizan. Julia Peña Barrikan jaio zen. Euskalduna zen eta baserriko alaba. Gaztetan, David Alvarez Ourenseko etorkin galegoa ezagutu zuen. Alvarezek jostuna izan nahi zuen, baina soldadutza egitea egokitu zitzaion, Guardia Zibilean, Bizkaian. Soldadutza amaitu eta gero, beste urtebetez jarraitu zuen institutu armatuan eta orduan ezagutu zuen Juliak. "Guardia Zibila uzteko asmoa sortu zitzaionean niri esateko beldur zen –kontatzen du Juliak–, uste baitzuen uniformeak txunditzen ninduela. Egia esatera, ni asko poztu nintzen utzi zuenean", gogoratu zuen aspaldi emakumeak. Handik hiru urtera ezkondu zen Davidekin. Argazkian, Dabi eta Mario anaien eta Eli Barrenetxea Marioren emaztearen oroigarriak Barrikan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun