Espainiako bandera jartzeko aginduari helegitea aurkeztuko dio Getxoko Udalak
Bilboko 2 zenbakidun Administrazioarekiko Auzi-Epaitegiak hile honetan kaleratutako epaiaren kontrako helegitea aurkeztea erabaki du, Imanol Landa alkatearen bitartez, Getxoko Udalak. "Udaletxeko kanpoaldean, barruko toki nagusi batean eta herri-zerbitzuetako gainontzeko eraikinetan Espainiako bandera era iraunkorrean jartzea beharrezkoa dela" ebatzi du aipatu auzitegiak. Getxoko PP izan da tokiko erakundeari sententzia bete dezala exijitzen lehena. Eduardo Andrade zinegotzi popularra ebazpenaren "zehaztasuna eta biribiltasuna" izan ditu aipagai: bere ustez, "interpretazio eta zalantzetarako aukerarik ez du ematen". Andradek aipatu duenez, 2007ko urrian eta 2009ko ekainean Getxoko PPk berak aurkeztutako mozio bana onartu zituen, gehiengo osoz —PP eta PSE-EEren botoekin—, Udalbatzak. Oraingo honetan, urgentziazko mozioa aurkeztu dute popularrek, urtarrilaren 29ko osoko bilkurara begira, sententzia bete dezala eskatuz Udalari. Bitartean, helegitea jarriko denez, "epaiaren behin betiko konfirmazioa izan arte, ez da bete behar izango", Landa buru duen Gobernu Taldeko iturriek adierazi dutenez. Beraien hitzetan, "konfirmazioa Udalak aurkeztuko duen helegitea bideratzen duen Epaitegi Gorenak erabaki beharko du". Argazkian, Marisa Arrue eta Luis Almansa Getxoko PP eta PSE-EEren bozeramaileak, aurreko batean, bandera espainola eta ikurrina atzean.
“Bere egunean esan nuen eta orain berriro diot”, agertu du Landak, “udaletxean ez dagoela inolako banderarik jarrita; eta ez dut atzematen gure auzokideen artean horixe kezka handienetakoa denik". "Gobernuko ordezkariaren bitartez, gaia auzitara eraman duen Alderdi Sozialistak Alderdi Popularraren bidea jarraitzeak eta, era honetan, identitate-gaiekin eztabaidak eta ernegatzeak sortu nahi izateak pena ematen dit, gai horiek herritarren benetako beharrekin bat egiten ez dutenean", gaineratu du alkateak. Edozein kasutan ere, Landak adierazi du, "Udaleko zerbitzu juridikoek esandakoaren arabera, epaiak hutsune larri batzuk" dituela eta horiek Apelazio Auzitegiak baliogabetzea suposa dezaketela. “Horregatik, zalantzarik gabe bere edukia onartu eta errespetatu arren, helegitea jarriko dugu eta Epaitegi Gorenak erabakia hartzea itxarongo dugu”, amaitu du udal agintari jelkideak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun