Gobela Ibaiko Uholdeetako Batzordearen beste bilera bat egitea adostu du, Uraren Euskal Agentziarekin (URA), Imanol Landa Getxoko alkateak. Eusko Jaurlaritzaren menpe dagoen erakunde horrek batzordea osatzen duten bizilagunei aipatutako ibaian egin beharreko premiazko jardueren hasieraren berri zuzenean ematea da batzarraren helburua, tokiko iturriek zehaztu dutenez. Hitzordua astearte honetan bertan, urtarrilak 26, jarri dute. Gogoratu, URA agentziak Gobela ibaiaren Egokitzapen Hidraulikorako eta Ingurumena Lehengoratzeko egindako Proiektuan aurreratutako jarduerak direla eta 6.000.000 eurotik gorako aurrekontua dutela. Lan urgente horien helburua da Gobela errekan dagoen uholde arriskua neurri handian gutxitzea. Argazkian, horrenbeste atzerapenen ostean, hondeamakinak ikusi arte ez dira lasai egongo Gobela inguruko auzokideek / © Arantza Gutierrez.
Honako bi alde hauetan lan egitea aurreikusita dago: Algortako Salsidu aldean, Getxo eta Berango arteko errepidean dagoen zubiaren ordez berria ipiniko dute eta, ezkerraldean, Getxo 1 institutuak dituen lurren beheratzea egingo da, baita Fadurako bide hezkuntzako instalazioetako eta tenis pistetako lurren kotaren eraiste eta beheratzea ere. Bestalde, Etxezuri-Larrañazubiko tartean, Negurin, Leioako Etorbidean eta Jolasetan zubi berriak ipiniko dituzte eta errekako ezkerraldeko lurren kota beheratu egingo da, aipatutako bi zubien artean, Jolaseta eta Lexarreta zubien artean eta Larrañazubi ikastetxeko inguruetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun