"Bizkaiko Foru Aldundiko Kultura Sailak aginduta", Algortako Ereaga hondartza alboko Begoña gazteluko "galerietan hotel bat altxatzeko baimen-espedientearen bideratzea dela eta, egiten ari diren azterketa teknikoak aholkatzen du aldez aurretik neurriak hartzea, eraikin horren aurrealdearen egoera txarragatik izan litezkeen lur-jausiei aurre egiteko", Getxoko Udaleko iturriek adierazi dutenez. Ingurutik dabiltzan oinezkoen segurtasuna babestu aldera, ingurua ixtea erabaki dute. Barcelo kateak luxuzko hotela egin nahi du Begoña gazteluko galerietan. Hala ere, hainbat traba aurkitu ditu bidean, Eusko Jaurlaritzaren txostenak tartean. Inguruko bizilagunak ere ez dira atzean gelditu: 2009ko maiatzean proiektua gelditzeko errekurtsoa aurkeztu zuten Arriluze Kaiko auzokide elkarteek, horrek euren "etxebizitzak lekututa dauden mendi magala hondeatzea aurreikusten duelako". Euren ustez, "legez kontrakoa da egitasmoa". Gorrondatxe kultur elkarteak, Getxo aldeko bizilagunek osatutako Sendoa elkarteak, Eguzki talde ekologistak, Uribe Kostako Txalaparta Ekimenetarako Sustapen Taldeak (UKTEST), Andra Mariko Auzo Elkarteak, Antena Ez taldeak, Koska Irratiak eta Itzubaltzeta / Romoko Branka kultur elkarteak, berriz, hainbatetan aldarrikatu dute Begoñako gazteluko galeriak erabilera publikorako izan daitezela. Argazkian, proiektuaren inguruko erakusketa, aipatu elkarteek antolatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun