Atxiloketez gain, etxe eta lokal ugari miatu dituzte. Besteak beste, Ondarroako Txokoko miaketan Xeber Uribe izan dute lekuko. Bestalde, ondarrutar batek Berria.info-ri jakinarazi dionez, Ertzaintzak kontrol handia ezarri du Ondarroa eta Markina bitarteko errepidean eta "ertzainek auto matrikula zerrenda luze bat dute, bi orri ingurukoa, eta zerrenda horren arabera gerarazten edo igaroarazten dituzte autoak".
Argibide gehiagorako: 11barri.info
Ertzaintzak bost lagun atxilotu ditu gaur goizaldean Ondarroan, Gizaburuagan, Mutrikun eta Deban. Bostei ETAko talde "legal" bat izatea eta 2008ko Ondarroako ertzain-etxearen aurkako atentatua egotzi dizkiete, besteak beste. 11barri.info Lea Artibai eta Mutrikuko agerkari digitalak jakinarazi duenez, atxilotuak honako hauek dira: Ibon Iparragirre Burgoa 36 urteko ondarrutarra, Gizaburuagako bere etxean atxilotua; Xeber Uribe (32) eta Asier Badiola (29) Ondarroan atxilotu dituzte; Xabier Zubizarreta (40) ondarrutarra Mutrikun atxilo hartuta; eta Jon Iñaki Esnaola (34), Deban. Atxiloketak Ertzaintzaren Terrorismoaren Aurkako Dibisioak burutu ditu, bere lehenengo ekintzan eta Eloy Velasco Espainiako Auzitegi Nazionaleko epaileak koordinatu ditu. Gainera, operazioa zabalik jarraitzen duela jakinarazi du Rodolfo Ares Herrizaingo sailburuak, Erandio Ertzain-hirian emandako prentsaurrekoan. Argazkian, Ertzaintzak kamerekin grabatu ditu atxiloketen zenbait irudi eta hedabide batzuetara bidali dituzte goizaldean. Alboan ageri dena "El Correo Español" egunkariaren edizio digitaletik hartua dago, eta bertan Gizaburuagako etxebizitzaren ataria ageri da, goizaldeko 3retan / © Herrizaingo Saila.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun