Bigarren urtez jarraian, Atzerritartasun Legeari eta horrek biztanleen jendarteratze prozesuan dituen eragin praktikoei buruzko informazio-saio batzuk antolatu ditu, hilabete bakoitzeko azken asteazkenetarako, Getxoko Udalak, ElkarGune harrera-programaren barruan. Heldu, atzerritarrak artatzeko Eusko Jaurlaritzaren zerbitzu juridiko-sozialeko teknikariek koordinatuta, kanpoko zein bertokoei zuzenduta daude saioak. Hitzaldietan aztertuko dituzten gaien artean honako hauek izango dira: atzerritartasunaren gaineko araudia eta horrek bizitzaren eredu desberdinetan daukan eragina; bizitzeko eta lan egiteko baimenak, berriztapenak, familiak biltzea, ikasleak, kanporatzeak... Informazio saioetara, bataz beste, nazionalitate desberdinetako 15-20 lagun joaten dira, udal iturrien arabera. Batez ere Hego Amerikakoak izaten dira, gehien bat Bolibiakoak. Kopuru txikiagoan Paraguaikoak, Hondurasekoak, Perukoak, Errepublika Dominikarrekoak, Kolonbiakoak eta Venezuelakoak. Marokokoak, Pakistangoak eta Senegalekoak ere joaten dira. Urteko lehen saioa asteazken honetan, urtarrilak 27, 19:00etatik 21:00etara izango da Villamonteko kultur aretoan, Algortan. Argazkian, emakume etorkin bat Algortako San Nikolas plazara bidean / © Getxo.net.
Egitasmoa "positibotzat" jotzen dute parte hartzaile gehienek, udal arduradunen arabera. Azaldu dutenez, "egoera irregularrean dauden pertsonak izaten dira. Beren egoera eta beren senideen egoera erregularizatzeko tramite administratiboei buruzko informazioaren bila joaten dira saioetara. Estatuan egoera legalean bizi diren pertsonak ere joaten dira, eta baita atzerritartasunaren gaineko legeari buruzko informazioa galdetzeko, erresidentzia baimenak berritzearen, familiak elkartzearen eta abarren berri lortzeko ere. Bertakoak ere joaten dira etxean lan egiteko kontratuez galdetzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun