Euskal Preso Politikoen Kolektiboari (EPPK) elkartasuna adierazteko gose-greba egiten ari diren sei leioaztarrek eguerdiko 12etan zeukaten Berbalamiñe euskara elkartearen egoitzatik ateratzeko agindua. Ordurako hogei bat lagun zeuden bilduta lokalaren kanpoaldean, haiei ere babesa emateko. Gose-grebalarietako batek salatu duenez (mp3), gaur bertan jaso dute Udalaren ezetza eurek aurkeztutako baimen eskaerari, itxialdia "astelehenetik ostiralera" egingo zutela adierazi zieten arren. Zehaztutako ordua baino hogei bat minutu beranduago heldu dira bertara udaltzainen bi buru. Baina, tentsio uneak tartean, denbora gutxira joan dira etorritako tokitik poliziak, lokal barruan zeudenak Udalaren idatzizko erantzuna jaso eta aterako ez zirela erantzun ostean. Ondoren, itzuli dira udaltzainak, 14:30ak aldera, irtenarazte aginduarekin. Gose-grebalariek ez dakite noiz eta nortzuk bueltatuko diren. Zantzu guztien arabera, Ertzaintza joango zaie. Bitartean, aurreikusitako ekimenekin jarraituko dute. Gaur bertan kontzentrazioa egingo dute, 20:00etan, Bulebarrean. Argazkian, udaltzainetako bat atean eta gose-grebalariak barruan.
Gose-grebalariek salatu dutenez, "modu harroputzean" heldu dira itxialdia egiten ari diren lokalera udaltzainak. Argazkiak ziren polizien kezka nagusietako bat: "borra luzagarria eskuan, argazkiak ezin genituela atera esanez etorri dira", aipatu dutenez. Barruan zegoen lagunetako bati kamera kendu nahi izan diotenean sortu da tira-bira, baina ez da gehiagora heldu. Kanpoko argazkilariei ere kamerak kentzearekin mehatxu egin die udaltzainetako batek, ondoren lokalaren atea itxiz. Azkenean, "nagusikeria handia erakutsiz" joan dira tokiko poliziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun