Arratsaldeko 17:10 aldera berrekin diote "Euskaldunon Egunkaria"-ren aurkako epaiketako bosgarren saioari, guardia zibilen bi perituren adierazpen harrigarriekin, Berria.info agerkariak adierazi duenez. "ETAk zenbateraino eragin zuen Egunkaria-ren administrazio kontseilua izendatzeko orduan?", galdetu dio Dignidad y Justicia herri akusazioko abokatuak peritu bati, eta honek erantzun du "Egunkaria"-k ez zuela akziodunik eta datuak faltsutu egiten zirela. "Boterea gutxi batzuen esku zegoen". Beste batek gauza bera, AVT herri akusazioko abokatuaren itaunari ihardetsiz: "Datu baseak faltsutu egiten ziren". Baina ez dute argitu ETAk agintzen zuenik, akusatzen duten bezala. Ez dute ustezko datu base faltsurik erakutsi, nahiz eta kazeta itxi zutenean goitik behera miatu zituzten honen egoitzak. Euskarazko kazetak urtero egin zituen akziodunen batzarrak; azkena, 2002ko ekainaren 15ean. "Egunkaria"-ren sorreran herritarren artean egindako diru bilketa ETArekin lotu dute guardia zibilek, "hori egitea ohikoa delako ETA eta KAS inguruan". Javier Gomez Bermudez epaimahaiburuak goizeko saioan jakinarazi duenez, gaurkoaren ostean otsailaren 1ean, 2an eta 3an jarraituko dute auzi saioek; hain zuzen ere, 3an amaitzeko. Epaiaren zain geratuko dira orduan. Argazkian, abenduaren 19ko manifestazioaren burua Bilboko udaletxean.
Goizeko saioan, Nerea Azurmendi "El Diario Vasco"-ko kazetari eta Deustuko Unibertsitateko irakaslea, Sebastian Barinagarrementeria "Egin" argitaratzen zuen Orain S.A.ko kudeatzaile ohia, Simeon Barroso Apika informatika enpresako burua, Ander Larrañaga Antza inprimategiko arduraduna, Jonan Fernandez Elkarri-ko koordinatzailea zena, Iñaki Zubeldia Ikastolako kooperatibako burua eta Jakin taldeko Joxe Azurmendi pentsalari eta idazlea eta Joseba Intxausti historialari eta idazlea izan dira deklaratzen. Defentsaren lekuko guzti horiek berretsi dute "Egunkaria"-k eta auzipetuek ez zutela ETArekin harremanik. Ondoren, auzipetuei atzemandako agirien itzulpenetan akats ugari daudela adierazi dute defentsaren perituek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun