Txetxu Fernandez Algortako euskal preso politikoa kolektibotik kanpo dagoela dio "El Pais" egunkariak. Fernandezek eta Langraizko espetxean dauden beste bost euskal presok idatzi ei duten balizko gutun bat eskuratu omen du PSOEren hurbil dagoen kazetak. "El Pais"-ek, baina, ostiralean argitaratutako artikuluan ez du ustezko idazkiaren testua bere osotasunean ematen eta balizko aipu txiki batzuk baino ez ditu erreproduzitzen. Haietako batean, gainera, "norberaren borondatez urrundu" direla ei diote presoek, norengandik eta "talde terroristarengandik", egunkariak egiten duen kontakizunaren arabera. Dena den, "El Pais" ez da egun hauetan presoen balizko gutunen bat argitaratu duen egunkari bakarra. Xelebreena, "Deia"-k eta Noticias taldeak Arnaldo Otegiri leporatu ziotena izan zen, Batasuneko mahaikideak erabat ezeztatu zuena.
Txetxu Fernandez urtarrilaren 15ean eraman zuten Burgosko espetxetik Langraizera. Igande horretan bisita izan zuten berarekin, eta gainerako preso politikoekin dago moduluan. "Txetxuri ez diote aldaketaren arrazoirik azaldu, baina tratamenduko arrazoiengatik izan bide da", orduan errepresioaren kontrako mugimenduak azaldu zuenez. Guardia zibil baten heriotzan zerikusirik zuelakoan, 1992ko maiatzaren 12an atxilotu zuten Txetxu Fernandez bere emazte Marian Perez del Riorekin batera, Barrikako euren etxean. Espetxeratu zituztenean hiru seme alaba txikiak utzi zituzten kalean, amamarekin bizi izan zirenak. Carabanchel, Brieva, Langraiz eta Logroñoko espetxeetan izan ondoren, Marian 1999ko irailean eraman zuten Martutenera. 2003ko hasieran kalera irten zen baldintzapeko askatasunean, baina fiskalak errekurritu egin zuen eta urte bat beranduago itzuli zen espetxera berriro. Azkenean, 2007ko ekainaren 30ean askatu zuten. Bien bitartean, Txetxu 30 urteko espetxe zigorra ari da betetzen eta erredentzioak aplikatuta 2010ean kaleratuko litzateke, Parot doktrina aplikatzen ez badiote. Kasu horretan, 2022ra arte ez lukete askatuko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun