Larunbatean, otsailak 6, arratsaldeko 5:30ean abiatuko da Bizkaia mailako finalaurrekoa Durangoko Plateruena Kafe Antzokian. Bertan, aldaketa nabarmenak izango daitezke antolakuntzan. Esate baterako, arauek hasieratik lau erregerekin jolastea agintzen badute ere, kontrakoa onartzen dute jokalari guztiak ados egonez gero. Horrela, Uribe Kostan, mahaian izandako bikoteek beti kontrakoa iritzi diote, eta partida guztietan zortzi erregeak erabili dira. Durangon, dena den, ohiturak bestelakoak dira. Endika Intxaustik Leioako kanporaketan esan zuenez, "okerrena da bertan lau erregeetara jolastu beharra, jokoa zeharo aldatzen baita". Intxaustik badu horretan eskarmentua. Izan ere, Euskal Herriko bosgarren gelditu zen aurreko txapelketan. Aurten, oraingoz, Durangon egoteko sailkatu da.
Txapelketaren finala, berriz, Seguran izango da, martxoaren 20an, oraindik ordua eta lekua ez dituztela zabaldu. Euskal Herriko II Mus Txapelketa Orreaga eta Iparra-Hegoa elkarteek eta Bai Euskal Herriari ekimenak antolatu dute. Besteak beste, AEK, "Berria", "Gara", "Deia" eta Info7 irratiak laguntzen dute.
Pasa den larunbatean jokatu zen Sopelan Euskal Herriko Mus Txapelketaren kanporaketa. Lamia tabernako hitzordura bost bikote agertu ziren eta, tarteka Athleticek Espanyol-en aurrean zelan galtzen zuen ikusten bazuten ere, are interesgarriagoa suertatu zitzaien amarruen eta hamarrekoen jokoa. Gauzak horrela, eta partida lehiatsuen ostean, Juanjo Ormaetxe Saitua eta Gorka Ormaetxe Larrazabal nagusitu ziren. Hori izango da, beraz, larunbat honetan Durangon jokatuko den Bizkaiko finalaurrekoan Sopela ordezkatuko duen bikotea. Haiekin batera, eskualdetik hainbat muslari sailkatu da: Berangotik, Karmelo Larraskitu eta Gabi; Leioatik, Unai Saiz eta Juan Angel Lamelas leioaztarrak eta Endika Intxausti eta Patxi Bilbao algortarrak; Itzubaltzeta / Romotik, Koldo Ortiz de Gineak eta Enrique Noya "Kini" algortarrak eta Venancio Perez eta Aitor Martin itzubaltzetarrak. Argazkian, urdinez, Juanjo Ormaetxe kamera agurtzen. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun