Baltasar Garzon Espainiako Auzitegi Nazionaleko epaileak egindako eskaera atzera bota zuen joan zen asteazkenean Frantziako justiziak, "El Correo Español" egunkariak adierazi duenez. Gauzak horrela, egun, aipatu herrialdean preso dagoen Aitor Artetxe algortarra ez dute Espainiara eramango, 2007ko abuztuaren 24an izan zen Guardia Zibilaren Durangoko kuartelaren kontrako atentatuan parte hartzea egotzita epaitzeko. Pariseko Apelazio Auzitegiak gogoratu du aurreko ebazpen batean ere euro-agindua "osatugabetzat" jo zuela, eta datu gehiago bidaltzeko eskatu zion Garzoni Edith Boizette epaile frantsesak. Lehen aipatu egunkariak adierazi duenez, Baltasar Garzon epaileak joan den asteazkenean, hilak 27, plazaratu zuen Artetxe bera zein Arkaitz Goikoetxea getxoztarra eta Jurdan Martitegi durangarra auziperatzeko autoa. Dagoeneko azaroaren bukaeran gazte algortarra estraditatzea onartu zuen Pariseko Apelazio Auzitegiak, 2008ko maiatzaren 19an Areetako Abrako Errege Itsas Klubaren aurkako erasoan parte hartzea leporatuta epai zezaten. Halere, Frantzian erakunde armatuko kide delakoan zabalik duen sumarioa burutu arte ez dute Espainiara eroango. Aitor Artetxe Frantzian preso dago 2008ko abenduaren 8an atxilotu zutenetik. Argazkian, Aitor Artetxeren irudia, Algortako beste bi euskal preso politikoren palen artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun