Getxoko Udalbatzak behin betiko onartu zituen, joan den ostiraleko osoko bilkuran, 2010eko udal aurrekontuak, 88 milioi euroko zenbatekoan. EAJren zinegotzi guztiek eta PSE-EEko ordezkariek erdiak, bik, eman zuten aldeko bozka. PP eta Alternatiba taldeek, berriz, ezezkoa eman zioten aurrekontuei; eta gainontzeko bi zinegotzi sozialistek zuri bozkatu zuten. Getxoko PPk, emandako ezetzaren arrazoiak berriro gogora ekarri zituen arren, gainontzeko alderdi politikoak ez ziren eztabaidetan sartu, talde bakoitzaren jarrera argi geratu zelako pasa den abenduko udal batzarrean. Udalbatza saioko zati handi batek PPk Algortako Basagoiti Etorbideko Telefonicako eraikina erosi edo epe luzerako alokatzeko egindako proposamenaren gaineko eztabaida izan zuen ardatz. Antzoki berriaren inpaktua gutxitzeko asmoz, bertan, Algortako Musika Eskola jartzea eskatua zuen Mari Arrue buru duen alderdiak. Hala ere, osoko bilkura aurretik ere, karta guztiak mahai gainean zeuden. Mozioa PP eta PSE-EEren aldeko botoekin onartu zuten, EAJk eta Alternatibak aurka bozkatuta. Halere, mozio hau "testigantzazkoa" dela zehaztu dute udal iturriek, "ez baita loteslea". Argazkian, zinegotziak aurreko udal batzar batean.
"Izaera bera du", tokiko agintariek aipatu dutenez, ostiralean onetsitako PSE-EEren mozio batek, zeinen bitartez, Getxo Antzoki inguruetako saltoki eta oinezkoentzat argi eta seinale gehiago ipintzea eskatzen zuten. Joseba Arregi Hirigintza zinegotziaren arabera, "neurriak hartu dira ahal izan den bakoitzean". Azkenik, PPk eta PSE-EEk Udalbatzari eskatu zioten, udaletxean eta udal erakundeetan Espainiako bandera jartzera derrigortzen duen azken epaiaren aurka, Udalak helegiterik ez aurkeztea. Proposamen hori ere "testigantzazkoa" da eta EAJren aurkako botoak eta Alternatibaren abstentzioa jaso zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun