Zor dien dirua eskatu diote Promociones Basañez Anaiak enpresa leioaztarrari 40 langilek
Txilibituak ahoan eta pankartak eskuan, Leioako Estartetxe kaleko 5 zenbakitik gertu batu dira, gaur, 40 bat langile. Era horretan, ordain diezaietela eskatu diete egoitza bertan, Ikea eraikinean, duen Promociones Basañez Anaiak SL enpresako arduradunei. Kaltetuen artean dira Kantabria aldeko Entrambasaguas herrian, Solares-en, bertoko hirigintza sustapen batean lanean dabiltzan Galdakaoko Materiales Ceramicos y Naturales enpresako 26 beharginak; baita lantegi galdakoztarrean azpikontratatuta lan egiten duten eskaiolista, elektrikari eta iturginak ere. "Basañezek ordaintzen ez duenez, guztiok izaten ari gara kaltetuak", adierazi du Materiales Ceramicos y Naturales enpresako langileetako batek. Azaldu duenez, "abuztutik ez dute fakturarik ordaindu" Leioakoek. Eta, denbora batez, Galdakaoko enpresak soldatak ordaintzeko diru nahikoa izan badu ere, "une honetan eutsiezina bilakatu da egoera". Langileek zehaztu dutenez, "azarora arte, 850.000 euro zor ditu" Promociones Basañez Anaiak SL enpresak, "azken fakturazioaren diruaz gain". Urriaren 21ean egin ei zuen azken ordainketa. Gainera, kobratzen ez duten arren, ezin dituzte Kantabria aldeko lanak bertan behera utzi, beharginek azpimarratu dutenez. Bestalde, "erruduntzat jo ez" baina, La Caixa erakundeari "erantzukizunak" exijitu dizkiote, "bera delako obra horiek finantzatzen ari dena". Argazkian, Promociones Basañezi eta La Caixari "iruzur egitea" leporatu diote langileek / cc-by Koska irratia. Argazki gehiago ikusteko sakatu hemen.
"Hasieran, arazoa La Caixarena zela esaten ziguten. Gero, Basañezena zela... Bada, bi erakundeek gure enpresarekin egin zuten batzar batean, ez kezkatzeko esan zieten gure nagusiei, urbanizazio lan horiek eskura ordainduko zirela. Esan bai, baina egin ez", langileetako batek salatu duenez. Berez, lan horiek fakturatu eta hurrengo hilabeteko lehenengo egunetan pagatzea izaten da ohikoena. Materiales Ceramicos y Naturales enpresako beharginen arabera, ordea, "abuztuko fakturak badaude ia azaroan egin ziguten ordainketan". Bitartean, "itxaroteko, pazientzia izateko..." esaten ari zaizkie Promociones Basañez Anaiak SL enpresako arduradunek. "Kontua da seme-alabak baditugula eta jan egin behar dugula. Gutako batzuek hipoteka ordaintzeari utzi behar izan diote, horrek dakartzan ondorioekin. Beste hainbati euren etxetik joan behar direla esaten ari zaizkio, alokairua ordaintzeko diru nahikoa ez daukatelako. Bitartean, txaletan ondo baino hobeto bizi dira haiek", kexatu dira langileak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun