Alkarbidek antolatutako “D bitamina. Aberastu bere heziketa!” leloko informazio kanpainatik kanpo geratzea erabaki ostean, 2 eta 3 urteko haurren etxeetara "heziketa elebidunen abantailak" azaltzen dituen gida bidaltzen ibili da Getxoko Udala. Horri lagunduz, Imanol Landa alkateak sinatutako eskutitza jaso dute ume getxoztarren aita-amek; 1.300 ale, guztira. Udal iturriek azaldu dutenez, “Ume elebidunen gurasoentzako esku-liburua” heziketa elebidunaren inguruan sortzen diren "zalantzetako batzuk" azaltzen saiatzen da, galderen eta erantzunen bidez, eredu horietan ikasten duten umeek dituzten "hainbat abantaila" aipatzearekin batera. Eta zalantzak zalantza, seguru aski, gurasoei ez die asko lagunduko Getxo.net udal webgunean azaltzea hezkuntza ereduak A, B eta C (sic) direla. Bitartean, otsailaren 12ra arte egongo da zabalik, 2010-2011ko ikasturterako, Lehen eta Bigarren Hezkuntzan aldez aurretik izena emateko epea, udalerriko ikastetxe publiko eta hitzartuetan (pdf). Izapideak hezkuntza zentroetan bertan egin beharko dira. Eskatutako agiriak honako hauek dira: erroldaren agiria, familia liburuaren eta errentaren aitorpenaren fotokopiak, eta ikastetxean emandako sartzeko eskabide-orria. Argazkian, 2008ko apirilaren 24an Getxoko udaletxearen aurrean euskalgintzak egindako kontzentrazioaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun