Elikadura eta sukaldaritza tailerrak abiatuko du etorkinentzako Getxon Bizi egitasmoa
Elikadura eta sukaldaritzari buruzko tailerrak hasiera emango dio aurten etorkinei zuzendutako Getxon Bizi programari (pdf). Getxoko Udalak antolatuta, Munduko Medikuak GKEak eskainiko ditu ikastaroak. Egitasmoa ElkarGune izeneko babes ekintzen esparruen barruan kokatzen da eta, helburua, beren bizilekua Getxon finkatu berri duten atzerritarrei ongizate pertsonalean zein gizarteratzen eta lan munduratzen laguntzea da, udal iturriek adierazi dutenez. "Doako tailer batzuen bitartez, besteak beste, gizarte eta lan gaitasunak sustatzen ditu; migrazioaren hasierako faseetan estresa gutxitzen laguntzen du; atzerriko beste pertsona batzuekin harremanak ezartzera laguntzen du eta harrera gizarteko pertsonekin elkartzeko baldintzak sortzen ditu" Getxon Bizi ekimenak, tokiko arduradunen hitzetan. Tailerrak igandeetan izango dira, otsailetik azarora bitartean, 10:00etatik 14:00etara, Itzubaltzeta / Romoko Ezekiel Agirre kaleko 21. zenbakian (Informatikakoa izan ezik, hori Algortako Fadura Institutuan izango baita). Amaitutakoan, ibilaldi bat izango da, euskal geografia, historia eta kulturaren adierazgarri diren herri eta lekuak ezagutzeko asmoz. Izen-ematea herritarren arretarako bulegoetan egin beharko dute interesatuek. Informazio gehiago lortzeko 944 660 151 telefono zenbakira dei dezakete edo www.kaixogetxo.net helbidera jo. Argazkian, emakume etorkin bat Algortako San Nikolas plazara bidean / © Getxo.net.
Lehenengo tailerra elikadura eta sukaldaritzari buruzkoa izango da, otsailaren 14ean, 21ean eta 28an eta martxoaren 7an, 14ean eta 21ean; eta ibilaldia Bilboko itsasadarretik, martxoaren 28an. Izena emateko epea zabalik dago jada. Hurrengoa informatikaren ingurukoa izango da, apirilaren 18an eta 25ean eta maiatzaren 9an eta 16an; eta ibilaldia Gasteizera, ekainaren 6an. Izena emateko epea martxoaren 31n irekiko da. Azaroaren 7an, 14ean, 21ean eta 28an informatika ikastaroa emango dute berriro, eta horretarako izena emateko epea urriaren 22an hasiko da. Irteera Harresiak Apurtuz erakundeak antolatutako Kultura Arteko Topaketara joateko izango da. “Mendekotasun egoeran dauden pertsonen zaintza” tailerra ekainaren 13an, 20an eta 27an eta uztailaren 4an, 11an eta 18an izango da. Uztailaren 25ean, Donostiarako txangoa egingo dute eta izena emateko epea maiatzaren 29an hasiko da. Azken tailerra, ostalaritza, irailaren 12an, 19an eta 26an eta urriaren 3an, 10ean eta 17an izango da; eta, ibilaldia, urriaren 24ean Markinara. Izena emateko epea abuztuaren 27an hasiko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun