EHUk urterik urtera Sarbiderako Programaren barruan burutu ohi dituen jardueren barruan kokatu behar dira azoka hauek, unibertsitate aurreko ikasleek ikasketak aukeratu baino lehen ahalik eta informaziorik zabalena izan dezaten. Azokek, hain zuzen, programaren bigarren fasean kokatzen dira, izan ere programa, urrian eta azaroan zehar, Batxilergo eta Goi Mailako Hezkuntza Zikloetako orientatzaileei zuzenduriko topaketa batzuekin hasi zen. Programa martxoan egingo diren Ateak Zabaltzeko Egunekin bukatuko da.
Bisitaldien kopurua bikoiztu da
Aurreko asteburuetan Arabako eta Gipuzkoako campusetan egin dira Unibertsitate-Orientazioarako Azokak. "Harrera bikaina izan zuten ekitaldiek, Araban 1.100 ikasle bildu baitziren informazio-postuetan unibertsitateari buruzko xehetasunak jasotzeko (2009ko Azokan 588 pertsona hurbildu ziren azokara) eta Gipuzkoan joan den urteko 1.124 ikasleetatik 2.100 ikasleetara pasatu dira", azaldu dute EHUko arduradunek.
Larunbat honetan, otsailak 6, Bizkaiko campuseko Unibertsitate Orientaziorako Azoka egingo dute, unibertsitate-aurreko ikasleen zalantza guztiak argitu eta ikasketen aukeraketa egiten laguntzeko helburuarekin. Ekitaldia 9:00etatik 14:30era arte izango da, Bilboko Ekonomia eta Enpresen Zientzien Fakultatean (Lehendakari Agirre etorbidea, 83). EHUk antolatu dituen unibertsitate orientaziorako hiru azoketatik azkena da Bizkaikoa. Jardunaldian EHUko irakasleek eta Unibertsitate Orientaziorako Zerbitzuak datorren urtean emango diren gradu berriei buruzko informazio zehatza emango dute, eta horretaz gain, unibertsitatera sartzeko bideei (selektibitate berria), tasei, bekei, ostatuari, garraioari edo kirol jarduerei buruzko informazioa lortu ahal izango da, unibertsitateko iturriek zehaztu dutenez. Jardunaldiak publiko guztiari irekiak dira. Bertan, 26 ikastegiren txokoak egongo dira, unibertsitatean burutu ahal diren graduei buruzko informazioa jasotzeko. Halaber, unibertsitatera sartzeko bideei eskainitako postua izango da, selektibitate berriari eta bekei buruzko xehetasunak eskuratzeko. Bestalde, Unibertsitate Orientaziorako Zerbitzuaren standa egongo da, baita kirolei eta gazte informazioari buruzkoak ere, garraio eta ostatuaren inguruko argibideak emango dituztenak. Argazkian, Leioa eta Erandioko campuseko hainbat fakultate.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun