Seigarren urtez antolatu du "Maite maitea" maitasun gutunen lehiaketa Sopelako Udal Kultura Sailak. Horrenbestez, interesatutako lagunek euskaraz edo gaztelaniaz idatzitako nahi beste gutun aurkezteko aukera izango dute, otsailaren 9ra arte. Gaia librea izango da, beti ere maitasuna edo maitasun ezarekin erlazionaturik baldin badago. Lehiaketa bi kategoriatan banatuta egongo da: batetik, gazteak, 12 urtetik 15 urtetara, eta 16 urtetik 18 urtetara arteko azpitaldeak bereiziz. Eta bestetik, nagusiena, beste bi multzok osatuta: 18 urtetik gorakoak eta 60 urtetik aurrerakoak. Sariei dagokienez, gazteen kategorian, adinaren araberako ezusteko oparia eta, nagusien artean, bi pertsonentzako afaria izango dira, azken horren data sariaren irabazleak aukeratuko duelarik. Gutunak lehen aipatu eguna baino lehen eman beharko dira Kurtzio Kultur Etxean (astelehenetik ostiralera, 11:30etik 14.30era eta 14:00etatik 20:00etara). Epaimahaiaren erabakia, berriz, hilaren 14an, San Valentin egunean, emango dute ezagutzera. Sari banaketa ere egun horretan izango da, Kurtzion 13:00etan egingo duten ekitaldian. Saria jasotzeko ezinbestekoa da ekitaldi horretara joatea. Argazkia: © Joseba Zubiaur - Sopelako Udala.
Maitasun gutun lehiaketako oinarrietan zehazten denez, ezinbesteko baldintzak dira hauek: bi orrialdeko gehienezko luzera eta jatorrizko lanak izatea. Gutun bakoitzak izengoiti edo lelo ezberdin bat eraman beharko du. Gutun-azalean kategoria agertuko da. Horren barruan beste gutun-azal bat sartu beharko da, azalean izengoitia zehaztuz eta barruan egilearen datuak aipatuz (izen-abizenak, adina, helbidea eta telefono zenbakia).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun