Iaz arte galdutako Agate Deunaren bezperako baserriz baserriko ibilbidea azkenengoz egin zuenetariko bat da Paulo Errazkin, 80 urte inguru dituena. Atsotitzak bota artean "gaztetxoei" gogoratu zienez, 60 hamarkada hartan goizeko 8etan abiatu eta hurrengo egunera arte zihoazen abesten, otzara aginaldoz betetzeko asmoz. Urdulizeraino joana da bera, "hankak ondo nituenean".
Baina Errazkinekin soilik ez ziren egon euskaltzaleak. Anton, Mari Karmen, Patxi Izko, Juan eta beste hamaika baserritarrekin izan ziren, gure memoria historiko bizidunari entzuten eta haietaz ikasten. Trukean, abestu eta aginaldoa eskatu zieten.
Ohituraren etorkizuna
Juanen aburuz, asko aldatu da ohitura. Alde batetik, lehen ez zuten paperik, kopla guztiak buruz baitzekiten. Beste aldetik, "taldean solista bat zen eta besteok koroa ginen". Gainera, dirurik ez, orduan txorizoak, solomoak eta horrelakoak batzen zituzten. Erabiltzen den euskara ere "sano" aldatu da, bere ustean. Juan "egun eta gaua" ematen zuen abesten. Leioako parajetan hasi zen, bertako koadrilarekin. Urteekin, baina, Algorta eta Berangoko inguruetatik ibiltzera pasatu zen. Egun, gazte euskaltzaleak saiatzen badira ere, ohiturak laster berea egingo duelakoan dago: "jubilatuak aguanta bitartean mantenduko da, baina gero akabatuko da dena". Izan ere, gero eta baserri gehiago husten dira.
Baina, aurtengoan gutxienez, goizeko 9etatik goizaldeko ordu txikietara entzun ziren bertsozaleen koplak. Izan ere, santari debozioz edo, goizean, arratsean eta iluntzean abestutakoaren ordainaz pagatuta, bazkaria eta gaueko parranda egin zuten.
Pasa den ostegunean, otsailak 4, Agate Deunaren bezperan, santa aitzakiatzat hartuta, Algorta inguruko baserriz baserri ibili ziren egun osoan zehar dozenaka euskaltzale. Algortako Bertsolari Eskolak (ALBE) eta Lauaxeta AEK euskaltegiak bigarren urtez antolatutako ekimenean ohiturak agintzen duen gabonsaria, aginaldoa, eskatu zuten inguruko baserritarrei. "Oles ta oles (mp3), oletan / Nor dabil ordu honetan? / Bertsozaleok, alkar hartuta / bazterrak inkomodetan" abestearekin batera, iaz arte 40 urte baino gehiagoz galdutako usadioa finkatzen aritu ziren ahots lirain eta zatarrez. Hamaika kilometroko ibilbidean, besteak beste, Antonen baserrian izan ziren, jada Algortan esnea saltzen duen bakarra, horretarako 50 behi fin dituela. Berangora ere egin zuten jauzi, "Santa Ageda (mp3)" abestera. Plantatxu bertsolari zenaren baserritik ere pasatu ziren, baita Paulo Errazkinen Astikagane baserritik ere. Horren lurrak Berango, Erandio, Algorta eta Leioa batzen ditu. Aldats pikoan gora ibili izana eskertu zien Errazkinek, aginaldoaz gain kopla zaharrak eman baitzizkien, bata erlijiosoa (mp3) eta bestea neskak gorteiatzekoa (mp3). Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun