“Canibales” izeneko film laburra eta “Hollywood, Je T´Aime” film luzea egongo dira ikusgai ostegun honetan, otsailak 11, Algortako Villamonte kaleko kultur etxean. Biak ala biak Zinegoak jaialdian izan dira, hau da, Bilboko gay-lesbo-trans zazpigarren nazioarteko zinemaldiaren egitaraua ofizialaren barruan. Emanaldia 20:00etan hasiko da, sarrera dohainik. Hala ere, ez da hori aipatu festibalak eskualdean utziko duen saio bakarra izango. Leioan bi egunetan jarri dituzte proiekzioak: asteazkenean, hilak 10, "Tanjong Rhu" film laburra eta "Hannah Free" film luzea izango dira ikusgai Kultur Leioan. Hurrengo egunean, ostegunarekin, berriz, "El amor/2" film laburra eta "Jay" film luzea proiektatuko dituzte areto berean. Leioako saio biak 20:00etan hasiko dira eta gonbidapenarekin sartu beharko da. Argazkian, Imanol Landa alkateak lagunduta eman du gaur, Algortako saioaren berri, Zinegoak zinemaldiaren zuzendari Roberto Gastonek / © Getxo.net.
Getxoko alkate Imanol Landak, ezberdintasunaren aurrean berdintasunaren aldeko Gobernu Taldearen "apustu tinkoa" agerian utzi du, gaur eskainitako prentsaurrekoan. “Lesbiana, gay eta transexualen kolektiboen eskubideen alde ibilbide luzea egin da baina oraindik asko dago egiteko. Kasu honetan, Getxon dagoen eskaintza kultural anitza aberasteaz gain, zinearen bitartez kolektibo hauek bizi duten errealitatearen beste ikuspuntu desberdin bat erakusten da”, adierazi du udal agintariak. Zinegoak zinemaldiaren zuzendari Roberto Gastonek, bere aldetik, gogoratu du krisialdiak eta diru-laguntza batzuen murrizketak (esaterako, Eusko Jaurlaritzak orain arte ematen zuena) behartu dutela antolakuntza aretoen eta proiekzioen kopuru orokorra murriztera. Algorta eta Leioan ez ezik, aurreko urtean Berangon eta Astrabuduan ere egon ziren ikusgai filmak. Hala ere, horrek ez du suposatu programatutako pelikulen kalitatea murriztu egin denik, Gastonen arabera. Zinegoak zinemaldiaren zuzendariak eskerrak eman dizkio alkateari Getxok oraindik eskaintzen dion laguntzagatik –zinemaldiaren “luzapenak” izeneko atala osatzen duten bost udalerrietako bat baita–, eta gaineratu du “hiri handietan ezberdintasuna gero eta naturalagoa den arren, udalerri txikiagoetan oraindik asko falta da egiteko, kolektibo hauen kideek direnak euren sexualitatea normaltasun osoz bizi ahal izateko“.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun