Algortako Biotz Alai eta Areetako Ondarreta (espainolez) abesbatzek elkartasun kontzertu bi eskainiko dituzte egunotan, Getxoko Udalaren laguntzaz. Bertan bildutako diru guztia orain aste batzuk lurrikara bortitza jasandako Haiti herrialdera zuzenduko dute. Emanaldiak ostiral honetan, hilak 12, Itzubaltzeta / Romoko San Jose parrokian, 20:15ean; eta larunbatean, hilak 13, 20:00etan, Algortako Bariko San Nikolas elizan izango dira. Kontzertuak elkarrekin egingo dituzte, hau da, abesbatza biek kantatuko dute bi kontzertuetan; biek abestuko dituzte erlijio pieza batzuk eta euren errepertorioetako herriko abestirik ezagunenak. Koru bakoitzak mila euro jarriko ditu ekimenerako eta jasoko duten diru guztia Caritas elkarteari emango diote. Halaber, kontu korrontea zabaldu dute BBKn, dohaintza eman nahi duten guztientzat. Ondoko izenpean: “Coro Biotz Alai. Ondarreta-Biotz Alai pro Haiti” / 2095 002200 9110331024. Nazioen Batuen Elkarteak (NBE) Petionville Country Club izeneko kanpamenduaren kudeaketa eman dio Caritasi, udal getxoztarreko iturriek zehaztu dutenez. Bertan, egunez, 20.000 pertsona hartzen dituzte eta 50.000 gauez. Elkarte horrek 32 eliz sare eta 58 apaiz jarri ditu lanean Haitin. Argazkian, Landa alkatea, erdian, bi abesbatzen presidenteekin batera, Haitiren aldeko kontzertuak aurkezten / © Getxo.net.
Imanol Landa Getxoko alkateak ondoko ekimena dela era harro dagoela aitortu du gaurko prentsaurrekoan, “askotan, udalerrian, hainbat eta hainbat elkartek duten konpromisoaren adibide garbia delako. Getxoko Udalak 6.000 euroko premiazko diru-laguntza onartu du jada, Eudelen bitartez bideratuko dena, baina ekimen hau, agian, are garrantzitsuagoa da herritik sortu delako, udalerrian ezagunenetarikoak eta adierazgarrienetakoak diren bi abesbatzetatik, hain zuzen ere. Horrek getxoztarrek besteen sufrimenduaren aurrean duten kontzientzia eta izaera solidarioa adierazten du”. Biotz Alairen presidente Txema Batarrita eta Ondarretako Pablo-Diaz Guardamino ere "ilusionatuta" azaldu dira ekimen honen aurrean, euren esanetan, "orain arte oso harrera ona izan baitu (izan ere, hasi dira dohaintzak jasotzen euren egoitzatan)". Halaber, argi utzi nahi izan dute abesbatzak lagunak direla, bien artean oso harreman ona dagoela eta ziurrenera, etorkizunean, elkarlaneko beste ekimen batzuetan ikusi ahal izango direla.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun