Hizkuntza ondarea jaso eta zabaltzeko hitzarmena izenpetu dute Uribe Kosta eta Erandion
Eskualdeko hizkuntza ondarea jaso eta zabaltzeko lankidetza hitzarmena sinatu dute, gaur goizean; Imanol Landak, Eneko Arruebarrenak eta Joseba Goikouriak; Getxo, Leioa eta Erandioko alkateek; eta Lemoizko udal mandataria ere baden Pedro Jesus Botejara Uribe Kostako Zerbitzu Mankomunitateko presidente ordeak. Helburuen artean, datozen urteotan monografikoak egitea eta argitaratzea dago, ingurua eta historia hobeto ezagutzen laguntzeko. Monografiek, gure esparru geografikoan gai bati buruzko jakintza-esparru oso bat hartuko dute (bata ahozko tradizio errimatuari buruz eta bestea herri egutegiari eta Uribe Kostako mitologiari buruz), zehaztu dutenez. Gehiena, adineko pertsonei grabaketetan jasoa eta beste ikerketa batzuetako materialez aberastuak. Bigarren helburua, jasotako materiala, egoera txarrean dagoenean (esanahia galdutako abestiak, zentzu argirik gabeko esaldiak, funtzio didaktikoa galdu duten ipuinak...), berreraikitzea da, ondoren zabaltzeko. Hitzarmena 2011ko abenduaren 31ra arte egongo da indarrean eta aurrekontua 60.000 eurokoa da. Argazkian, ezkerretik eskuinera, Botejara, Arruebarrena, Landa eta Goikouria.
“Orain arte udalerri bakoitzean lan egin da esparru horretan eta orain batera jokatzeko une aproposa izan daitekeelakoan hitzarmena sinatu dugu”, adierazi du Imanol Landa Getxoko alkateak. Eskualdeko herri guztietan jasotako materiala bateratzean, kalitatea zaintzean eta guztiok erabili ahal izateko formatuan jartzean datza ekimena. Hori dela eta, egindako lana herritarren artean zabaldu nahi dute, produktu interesgarriak sortuz. Produktu horiek, besteak beste, ondarea ezagutzera emateko, kultur interesa sortzeko eta ingurua hobeto ezagutzeko baliatuko dituzte. Landaren hitzen, “euskara maite dugunontzat ekimen ona da, lehenengo aldiz, eskualdeko udalerri desberdinek euskararekiko eta tokian tokiko hizkuntzarekiko konpromisotik batera lan egingo dugulako; esfortzuak, estrategiak eta baliabideak komunean jarriz, gure altxorra den aurreko belaunaldiek utzitako hizkuntza ezagutze eta zabaltze aldera”. Agintari getxoztarrak gaineratu du ondasun hori galtzeko arriskuan dagoenez, “bildu, zabaldu eta ezagutzera eman nahi" dutela, "mantendu eta kultur zein hizkuntzako interesa berpizteko asmoz”. Ildo berari heldu diote gainontzeko alkate eta ordezkariek, “gure hizkuntza mantentzeko lan eta esfortzuak batera egitearen garrantzia“ azpimarratuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun