Etzi, ostegunarekin, "Euskaldunon Egunkaria"ren aurkako sumarioetan epaitutako eta auziperatutako lagunei elkartasuna adieraziko diete Leioa eta Erandioko campusean. Berria.info-k jakinarazi duenez, ostegunean hainbat elkarretaratze izango dira Hego Euskal Herriko unibertsitateetan. Leioako hitzordua eguerdian izango da, Mikel Laboa plazan. Beste protestak honako lekuetan izango dira: Ibaetako gelategian, Gasteizko Letretako Fakultatearen atarian, Mondragon Unibertsitateko Eskola Politeknikoaren aurrean eta Nafarroako Unibertsitate Publikoko Iruñeko campusean, liburutegiaren aurrean. Elkarretaratze guztiak eguerdian izango dira, Iruñekoa izan ezik, 11etan burutuko baita. Bitartean, Martxelo Otamendi "Euskaldunon Egunkaria"-ko zuzendaria zenak hainbat hitzaldi emango ditu bihar eta ostiralera arte, Durangon, Balmasedan eta Asturiasen. "Egunkaria" 2003ko otsailaren 20an itxi zuten eta pasa den abenduaren 15ean hasitako epaiketa otsailaren lehenean amaitu zen. Egun, Xabier Oleaga erandioztarra, Martxelo Otamendi, Iñaki Uria, Txema Auzmendi eta Joan Mari Torrealdai epaiaren zain daude. Argazkian, pasa den abenduaren 19an Bilbon egindako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun