Asteazkenean, Innova Ensemble haizezko boskotea izango da protagonista, 2008an izen bereko taldearen baitan eratutako talde gaztea, ganbera-musika zabaltzera dedikatzen dena eta musika garaikidearekiko interes berezia duena. Taldekideek Bartzelonako Gran Teatre del Liceu Antzokiko Akademiaren Orkestran ezagutu zuten elkar eta Espainian nahiz handik kanpo ospetsuak diren orkestratan hartu dute parte.
Zikloaren erdialdean, ostegunean, "Euskal Kantu Liriko Berria" proiektua ekarriko dute Getxora Marta Velasco mezzo-sopranoak, Alberto Nuñez tenoreak eta Juan Jose Ortega piano-joleak. Euskal konpositore klasikoen lana ezagutzara eramateko beren indarrak batu dituzten hiru artista dira Velasco, Nuñez eta Ortega.
Ostiralean, Bizkaiko Orkestra Sinfonikoa ariko da, 2004an Bizkaiko goi-mailako musikari gazte tituludunek sortutako taldea. Orkestraren kideak Bilboko Goi Mailako Musika Kontserbatorioko eta Musikeneko azken promozioetako kideak dira eta, nahiz eta gazteak izan, esperientzia nabarmena dute. Kasu honetan, BOSek Vivaldi, Haendel eta Mozart konpositoreen piezez osatutako programa joko du.
Bukatzeko, Brodsky Quartet arduratuko da larunbatean zikloa datorren urtera arte agurtzeaz. Eremu klasikoko harizko laukote ospetsuenetakoa da eta bere 30 urtetik gorako ibilbide profesionalean mundu osoan zehar aritu da. Grabazio ugari egin dituzte eta artista ezagunekin batera aritu dira. Getxorako duten programan, Schubert, Turina, Shostakovich, Mozart, Puccini eta Borodin konpositoreen piezak eskainiko dituzte.
Getxoko Kontzertu Klasikoak jardunaldiek 25 urte beteko dituzte aste honetan, eta urtemuga dela eta, nazioarteko talde ospetsuak ariko dira zikloan, artista gazteekin batera. Asteartetik larunbatera arte bost saio izango dira Areetako Andres Isasi Musika Eskolan, ostiralean izan ezik, egun horretako kontzertua Algortako Erredentore elizan izango baita. Saio guztiak 20:00etan hasiko dira, Getxoko Kultur Etxeko iturriek jakinarazi dutenez. Bihar, nazioartean ganbera-talderik onenetakoaren ekitaldia izango da, The Schubert Ensemble of London taldearena, hain zuzen ere. 25 urtetik gorako ibilbidearekin, boskoteak mundu osoan zehar eskaini ditu kontzertuak eta bere diskoek hainbat sari lortu dituzte. Areetan, Hummel, Brahms eta Schubert konpositoreen piezez osatutako programa eskainiko dute. Argazkian, boskote ingelesak zabalduko du bihar kontzertu zikloa / © Schubert Ensemble.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun