Ostegunean, otsailak 18, bi saskibaloi partida jokatuko dira 19:00etan eta 21:30ean, Barakaldoko Bizkaia Arenan, eta Athletic-en Europako Ligako norgehiagoka 21:05ean. Metro Bilbaok hamar minuturo jarriko ditu trenak, gutxi gorabehera, partida horien ostean zaleak etxera bueltatzeko.
Ostiralean, otsailak 19, beste bi saskibaloi partida direla eta, 19:30ean eta 21:50ean, horiek amaitzen diren orduan maiztasuna handituko da. Ansioko geltokitik hamar minuturo irtengo dira Etxebarrira bidean, eta bi lineetara. Gauez, ostiralero bezala, metroaren zerbitzua ordu bietan amaituko da.
Larunbatean, otsailak 20, bi saskibaloi norgehiagoka berri jokatuko dira, 18:00etan eta 20:30ean, hurrenez hurren, eta horiek amaitzean tren gehiago egongo da. Gau horretan Inauteriak ospatzen dira metroa pasatzen den hainbat herritan, Algortan eta Sestaon, esaterako; eta metroaren maiztasuna handituko da, larunbateko 23:00etatik igandeko 6:00etara. Gauez, maiztasuna 15 minutukoa izango da bide-zati komunean (Etxebarri-San Inazio) eta Bidezabalera doan bide-zatian; eta 30 minutukoa gainerakoan, hau da, Plentzia eta Santurtzira bidean, norabide bietan.
Igandean, otsailak 21, Athletic-ek ligako partida jokatuko du San Mamesen, 17:00etan, eta saskibaloi Kopako finala BECen, 19:00etan. Horregatik, metro zerbitzua indartu egingo da aurreko eta ondorengo orduetan. Batez beste, zazpi minutuko maiztasunaz ibiliko dira trenak, metro zerbitzua amaitzen den arte, 23:00etan.
Kirol ekitaldiak eta Inauteriak tarteko tren gehiago ibiliko da ostegunetik igandera
Metro Bilbaok "inoiz ez bezalako" dispositibo berezia ezarriko du kirol eta kultur ekitaldiz betetako aste bukaera honetan, garraio enpresako iturriek adierazi dutenez. Asteburu honetan izango dira Espainiako Saskibaloi Errege Koparen finala Barakaldoko Bizkaia Arenan (otsailaren 18tik 21era), Athletic-en Europako partida (hilaren 18an) eta Sestao eta Algortako inauteriak (Astrabuduan eta Plentzian ere badira), beste ekitaldi batzuen artean. Horri zurigorrien igandeko ligako partida gehitu behar zaio. Ekitaldi horien guztien ondorioz, metroa ustiatzen duen enpresak bere baliabide teknikoak eta giza baliabide guztiak aktibatuko ditu, osteguna eta igandea bitartean, espero den eskaerari aurre egiteko. Zerbitzua aipatu kirol ekitaldi horien aurretik eta ondoren indartuko dute. Horretaz gain, larunbat gauean zehar ere tren gehiago ibiliko dira. Argazkian, metro geltoki bat bidaiariz gainezka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun