Lanak bukatuko direnean, Andres Cortina kaleko behin-behineko espaloiek 2 metro eta erdi inguruko zabalera izango dute. Aldi berean, eremu horretan behin betiko hesia lekutzeko lanak amaituko dituzte. Horrek oinarrian metro bateko alde itsua izango du, baina horren gainean beste bi metroko altuera izango duen sarea izango da. Alde batetik, lanak ikustea ahalbidetuko du eta beste aldetik, ez die argitasuna kenduko inguruko etxe eta dendei, Getxoko Udalak jakinarazitakoaren arabera.
Halaber, lanak behin amaituta gune horretan argi gehiago ipiniko da. Hartara, urria aurretik zegoen ohiko oinezkoentzako pasabidea lehengoratuko dute. Gaur egun, galtzada-ardatzetik Andres Cortinako espaloi zaharrean dagoen instalazioen zangan zehar doazen hiri instalazioak desbideratzeko lanean ari dira. Izan ere, pasa den ostegunean "telefonia operadore pribatu ezagun batek" gas natural hornidura eten zuen inguruan, Andres Cortina kaleko 18. zenbakiaren parean, "zuntz-optikoa ipintzeko kanalizazio lan batzuk egiten ari zela". Lan horiek ez zuten Getxo Antzokikoekin loturarik.
Getxo Antzoki berria eraikitzeko lanak direla eta, azken asteotan hainbat eragozpen bizi izan dituzte inguruko kaleetako auzokide, dendari eta bisitariek. Horietako oztopoetako bat bihar kenduko dute, udal iturrien arabera "Getxo Antzoki kultur zentro berria eraikitzeko lanetan izandako aurrerakadaren eraginez". Zehatz-mehatz, bihar, ostegunarekin, "oinezkoentzako ibilbide berria zabalik egongo da Andres Cortina kalean, Muxike Aurrekoaren elkargunetik aurrerako tartean, Algortako Etorbiderako noranzkoan", Udalak jakinarazi duenez. Korridore horrek etxeetako fatxadetatik paraleloan doan zirkulazioa egokituko du, lehengo espaloian zehar. Andres Cortinako lanak martxoaren hasieran bukatzea aurreikusten dute, egun, bertan egiten ari diren lanek "lehentasun osoa" dutela. Argazkian, Getxo Antzoki ondoko lanak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun