Gainera, epaiketan, "ia sei urteko" instrukzio eskasa gelditu zen agerian, gaztetxe barruan atxilotutako gazteei kanpoan istiluak sortu izana leporatzen zitzaiela. Nabarmenagoa oraindik izan zen ertzain baten akatsez auziperatu zuten bilbotar baten kasua, desalojoaren egunean lan-istripu baten ondorioz etxean bajan izan zelako, bere familiak, ugazabak eta baita gaizki identifikatutako okupak deklaratu zutenez. Ertzainak, berriz, tematu zen bere identifikazioa defendatzen eta defentsa abokatu batek lekukotasun faltsua emateagatik salatuko zuela iragarri zuen. Bitartean, makina bat lekukok gogoratu zuten egun hartan Ertzaintza izan zela oldartu zen bakarra.
Itzubaltzeta gaztetxearen etorkizuna kolokan
Epaileak atzera bota egin ditu espetxe eskaerak Itzubaltzeta gaztetxe ohiaren auzian
Santa Eugenia kaleko I. Itzubaltzeta gaztetxearen desalojoagatik auziperatutako zazpi gazteak errugabe jo dituzte ia kargu guztietatik. Izan ere, Bilboko Penaleko bigarren epaitegiko magistratuak hiru lagun baino ez ditu errudun jo, eta soilik ertzainei irainak esan zizkietelakoan. Hori dela eta, 160 euroko isun bana jarri die. Pasa den otsailaren 2an epaitu zituzten gazteak eta Fiskaltzak, guztira, 12 urteko espetxe zigorra eta 1.650 euroko isuna eskatu zituen, iskanbilak sortu eta ertzainei desobedientzia egin eta irainak botatzea egotzita. Oraindik sententzia ez da irmoa eta Fiskaltzak zein defentsek errekurritu dezakete. Zigortuetako bi lagunen abokatuaren arabera, epaileak ez du kontuan hartu akusatuek lehen unetik irainak gezurtatu zituztela eta gertaerak 2004ko irailaren 27an izan zirenetik Justizia Administrazioak "atzerapen bidegabea" izan duela, zigorra leundu behar lukeena. Hortaz, ez du errekurritzea baztertu. Argazkian, Itzubaltzeta / Romoko dozenaka gaztek atxikimendua eskaini zieten auziperatuei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun