Loiuko aireportutik gertuko udalerrietako 54 etxebizitza gehiago intsonorizatzea onartu berri du Espainiako Aireportuak eta Aireko Nabigazioak (AENA) erakundeak. Horiek gehituta 62 dira orain arte onetsitako ekintzak. Izan ere, dagoeneko 8 etxebizitza hosgabetu dituzte. Bilboko aerodromoaren Ingurumenaren Jarraipen Batzordearen gaurko bileran eman du azken erabakiaren berri AENAk. Horretaz gain, "aurreko batzarrean adierazitakoaren harira", helikopteroek aireportuan egiten dituzten maniobren gaineko azterketa egiten ari da erakunde espainiarra, horien soinu inpaktua gutxitzeko asmoz. AENAz gain, Espainiako Gobernuko Landa, Itsaso eta Ingurumen Ministerioak; EAErako Espainiako Gobernuaren Ordezkaritzak; Bizkaiko Foru Aldundiak; Erandio, Derio, Loiu, Sondika eta Zamudioko udalek; eta Lur Maitea talde ekologistak parte hartzen dute lehen aipatu batzordean. Hain zuzen ere, Loiuko aireportu inguruko alkateek lankidetza sistema bat eskatu dute Espainiako Gobernuko Sustapen Ministerioarekin batera jarduteko. Gogorarazi dute Txorierriko inguruko udalerrietan edozein lan egiteko Espainiako Aireportuak eta Aireko Nabigazioa AENAren baimena lortu behar dutela, eta nabarmendu dute horrek inguruan dauden egitasmoak "denboran luzatzea" ekartzen duela eta "kalte handia" eragiten duela. Argazkia: cc-by-sa Mikelo.
Sondikako alkate Gorka Carrok eman zuen herenegun kezka horren berri, EAJko parlamentariek bultzatuta, Espainiako Kongresuko Sustapen Batzordean. Bestalde, hainbat lagun eta taldek bat egin dute Lur Maitea talde ekologistako bi kideri jarri dieten zigorraren harira, elkartasuna erakusteko. Atzo 40.000 euroko bermea ordaindu behar izan zuten bi ekologista horiek, Derioko alkatearen izena gezurrez belztea egotzita jarri dieten zigorra betez. Lur Maiteak Loiuko aireportuaren inguruan ingurumenari kalte egin dioten egitasmoak kritikatu baino ez dituela egin salatu dute atxikimendua eman duten eragileek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun