Getxoko Udalaren Berdintasun Zerbitzuak antolatuta, asteartean (otsailak 23) martxan jarriko dute sexologiari buruzko informazio eta aholkularitza zerbitzua, sexuari buruzko mota guztietako galderei erantzuteko asmoz. “Helburua adin guztietako pertsonei laguntza ematea da, sexualitatez gehiago goza dezaten, beraien nahiekin eta interesekin lan eginez edo sexu zailtasunak gaindituz; zalantzek, aurreiritziek edo informazio faltak berak zailtasunak ekartzen baitituzte norberaren sexualitatea eraikitzeko garaian”, azaldu du gaurko prentsaurrekoan Keltse Eiguren zinegotziak. Antisorgailuei buruzko oinarrizko informazioa ere eskainiko diete eskatzen dutenei. Zerbitzua adin guztietako lagunentzat, gizonentzat zein emakumeentzat, egongo da zabalik Algortako Martikoena kaleko 16 zenbakian, Alangoko osasun zentro berriaren ondoan. Arratsaldez irekiko dute, 17:00etatik 20:00etara; eta garrantzitsua da aldez aurretik hitzordua eskatzea, tokiko arduradunek zehaztu dutenez. Telefono zenbakia ondokoa da: 944 660 137. Eta posta elektroniko helbidea: sexuinfo@getxo.net. Argazkian, Keltse Eiguren Berdintasun zinegotzia aurreko prentsaurreko batean.
Sexologia alorreko profesional batek erantzungo ditu galderak eta, horiek, konfidentzialak izango dira. Kontsulta bat egin nahi duten pertsonek telefonoz, e-postaz edo elkarrizketa pertsonalen bitartez (indibidualak, bikotean edo lagunekin) egin ahal izango dute. Saioaren iraupena gaiaren araberakoa izango da. Gainera, Eigurenek gogoratu du Getxok “Berandu ez heltzeko” heziketa sexu-afektiboko programa ere duela, Lehen Hezkuntzako 6. mailako ikasleei zuzenduta. Udalerriko 7 ikastetxetako 14 taldek parte hartzen dute. Izan ere, “sexu heziketa pertsonen garapen integralean oso garrantzitsua dela uste dugu”, Berdintasun zinegotziak gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun