Immigrazioko Unitatearekin elkarlanean, “Emakumeak kultur arteko elkarrizketan” zikloa antolatu du Getxoko Berdintasun Zerbitzuak. Orotara, lau saio izango dira, hilabeteko azken ostegunetan, otsailetik maiatzera. Jabekuntza Eskolako ikasleek beraiek eskatuta, “protagonisten eskutik migrazioen prozesura hurbiltze eta esperientzien trukearen bitartez ezagutzea" da helburua, gaurko prentsaurrekoan Keltse Eiguren zinegotziak adierazi duenez. Jardunaldiak datorren astean abiatuko dituzte, otsailaren 25an, “Emakume etorkinen elkarteak, eta elkartze-ehuna sortzeko beraien proposamenak” gaia jorratuz. Emakumeak Aniztasunean, Munduko Emakumeak, Garaipen, ARAHMA (Emakume eusko-arabiarren elkartea) eta Malen Etxea taldeek parte hartuko dute. Saio guztiak Algortako Kultur Etxean, Villamonten, izango dira, 19:00etan. Haurtzaindegi zerbitzua ere egongo da. Argazkian, emakume etorkin bat Algortako San Nikolas plazara bidean, aspaldi / © Getxo.net.
Topaketetan herrialde desberdinetako emakumeak izango dira eta horiek immigrazioaren egoeraren genero ikuspegia eskainiko dute, gai batzuei lotuta; tartean, etxeko enplegua, genero indarkeriari, eta abar. Martxoaren 25erako gaia, berriz, “EAEko emakume etorkinek Etxeko Enpleguan bizi duten errealitatea. Mendeko pertsonen zaintza” izango da, Silvia Carrizorekin, Malen Etxea elkarteko “Manos que mueven el mundo” azterlanaren egilearekin. Apirilaren 29an, “Emakume etorkinak eta indarkeri sexista” gaia aztertuko dute. Eta azken egunean, maiatzaren 27an, gai irekia izango da, topaketan bertan sortzen diren proposamenak guztion artean eztabaidatzeko. El Salvadorreko Ana Murcia izango da dinamizatzailea. Generoan aditua eta Garaipen elkarteko kidea da. Horrek metodologia parte hartzailea sustatuko du, hausnarketarako hitzaldiak eta eztabaida bideratuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun