Algortako Telletxe plazatik abiatuta, 200 herritar inguruk egin dute manifestazioa kaleetan zehar, Jon Rosales gazte algortarrari eta atxilotutako gainontzeko lagunei elkartasuna adierazi eta horiek guztiak aska ditzatela aldarrikatzeko asmoz. Rosales atzo atxilotu zuten Gironan, Bergaran jaio eta Elorrion bizi den Adur Aristegirekin batera. Mossos d'Esquadra Poliziak iluntzean jarri zituen biak guardia zibilen eskuetan, eta horiek Madrilera eraman. Horrenbestez, zazpi dira Guardia Zibilaren eskuetan inkomunikatuta jarraitzen duten euskal herritarrak. Bitartean, Bilboko San Inazio auzoko Ibai Beobide gaztea gaur espetxeratu dute, Ismael Moreno Espainiako Auzitegi Nazionaleko epailearen aginduz. Inkomunikazio egoerak iraun artean, mobilizazioekin jarraituko dute Algortan, Amnistiaren Aldeko Mugimenduak iragarri duenez (mp3). Bihar eta etzi 20:00etan jarri dute hitzordua Telletxen. Igandean, berriz, ikusteke dago Jon Rosales gazte algortarra epailearen aurrera eramaten duten ala ez. Argazkian, gaurko manifestazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun