Jon kartzelatik gure eskarien alde agertu zen idatzi sorta baten bitartez, horietariko batzuk hedabideetan agertu zirelarik. Gurekin elkartasuna agertzera deitzeaz gain, bere egiten zuen funtzionaritzari egiten genion intsumisioa. Intsumisioa jarrera antimilitarista baino gehiago zela zioen, eta borroka gune ugari zituela.
Kartzelak Jonek zeukan idazteko grina eta dohaina kilikatu egin zituen. Giro kaltegarri hartatik ihes egiteko ere balio izan zion idazteak, tentsio ugariren ihes-balbula modura. Kartzela barruko bizitza ez zen samurra izan Jonentzat. Duintasuna defendatzeko esfortzu handiak egin behar izan zituen. Eta haien ondorioz gaixotu egin zen. Baliteke heriotzara eraman duen gaixoa ere ahalegin haien ondorioa izatea.
Kartzelatik irten zenean han idatzitako poema eta ipuinek osatutako liburua argitaratu zuen: Kartzelako lanak. Hor ondo ikusten dira Jonen dohain poetiko eta narratiboak. Idazle berezia zen, burutsua, gatz eta piperduna, euskara eta gaztelania ongi menperatzen zituena.
Kalean zegoela zenbait elkartasun borrokatan parte hartzen segitu zuen. Ezin ahaztu Ataramiñe izena daraman iniziatiba ederrean egindako lan eskerga. Edo gau eskolatan egindakoa.
Har ezazu atsedena, lagun. Ez zaitugu inoiz ahaztuko.
Antton Azkargorta eta Jose Luis Herrero, EHUtik kaleratutako irakasleak
Sekulako atsekabea hartu dugu Jon Etxeandia preso ohiaren heriotzaren berri izan dugunean. Gazte hil den arren, bizitza oso betea izan du Jonek. Preso zegoelarik rol garrantzitsua jokatu zuen gure Irakasleria Propioaren aldeko borrokan. Kontratu administratiboa ez sinatzeagatik UPVtik kaleratuak izan baino apur bat lehenago, gutariko batzuek -ikasleekin batera- gose greba bat egin genuen Salto del Negroko kartzelako presoek haien eskubideak berreskuratzeko zeramaten borrokarekin elkartasuna adierazteko. Preso haien artean Jon Etxeandia zegoen. Gure egintza hark agintari akademikoek inposatu nahi ziguten bidegabekeriaren aurrean ez makurtzeko adorea eman zigun, eta geroago pankartaren inguruan bilduko zen taldea trinkotzeko balio izan zuen. Argazkian, Jon Etxeandia "Ataramiñe 08" liburuaren aurkezpenean, 2008ko abenduaren 2an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun